Цените на пченицата го продолжија брзиот раст искачувајќи се над 11 долари за бушел, највисоко ниво во последните 14 години, бидејќи руската инвазија на Украина доведе до блокада на извозот од Украина, која е петти најголем извозник на пченица во светот.
Фјучерсите на пченицата во средата достигнаа 10,59 долари за бушел, што е раст од 7,62%, што е највисоко ниво откако пченицата се тргуваше на 10,9125 долари на 26 март 2008 година.
Војната и последиците од опсежните санкции на САД и Европа врз Русија ги ограничија испораките од Црното Море во време кога глобалните залихи се веќе на ниско ниво. Украина и Русија учествуваат со околу 30% во светскиот извоз на пченица, а борбите ги затворија пристаништата, го запреа транспортот и ја прекинаа логистиката.
Војната, исто така, го загрозува садењето оваа година во Украина, бидејќи земјоделците би можеле да бидат вклучени во борбите, а семињата и ѓубривата ќе бидат во недостиг.
Недостатоците веројатно ќе се прелеат на следната сезона, или потенцијално уште подолго.
Жетвата на пченица во Северна Америка и другите делови на Европа ќе биде критична ова лето за да се спречат поголеми зголемувања на цените.
Цените на пченицата се зголемија за 50% во текот на февруари, што ја поттикнува и глобалната инфлација на храната.
Ова доаѓа во време кога нафтата и другите стоки исто така растат, принудувајќи ги централните банки да ја заострат монетарната политика по години на ултра ниски стапки.
Русија и Украина се исто така главни снабдувачи на пченка, јачмен и сончогледово масло. Цените на пченката се зголемија на највисоко ниво од 2012 година, додека маслото од соја и палминото масло достигнаа исто така рекорди.
Во меѓувреме, Кина, најголемиот светски увозник на пченка и соја и еден од најголемите купувачи на пченица, во изминатиот период ги зголемува основните резерви, што придонесува кон зголемување на цените на глобалните пазари.
Египет, најголемиот увозник на пченица, е во најтешка ситуација. Според Обединетите нации, Русија и Украина испорачале 86 % од увозот на пченица во земјата во 2020 година, а комбинацијата од војна, острите санкции и зголемените трошоци за превоз и осигурување ги попречуваат напорите за обезбедување на залихи.
Тоа носи дополнителен притисок во оваа северноафриканска држава, каде што зголемените трошоци за храна придонесоа за протестите на Арапската пролет пред една деценија.
Извор: Bloomberg
