Светскиот најголем производител на катализатори за дизел мотори Џонсон Мети, кој истовремено е најголем извозник и најголема компанија во земјава, планира на глобално ниво да скрати 2.500 работни места како последици на негативните ефекти врз автомобилската индустрија од кризата предизвикана од пандемијата со Ковид 19 и намалената побарувачка за филтрите и катализаторите кои ги произведува, објавува Ројтерс.
Од компанијата објаснуваат дека намалувањето на бројот на вработените, што претставува 17% од вкупната работната сила на Џонснон Мети е дел од новиот план со кој трошоците на работење на компанијата треба да се скратат за 100 милиони долари во следните три години.
“Одлуката да се намалат трошоците и влијанието врз работните места беше тешка”, вели главниот финансиски директор Ана Манц во изјава за Ројтерс, но потенцира дека тоа се вистински одлуки кои имаат за цел да се овозможи Џонсон Мети да биде добро позициониран и да одговори на предизвиците на долг рок.
Од Џонсон Мети објаснуваат дека кратењето на трошоците ќе дојде од консолидрањето на фабриките во Clean Air Division, кој опфаќа околу 60% од вкупните продажби и преку употреба на подобра технологија за оптимизација на организацијата.
Засега нема информации дали планираното отпуштање и кратење на трошоци ќе ги зафати и фабриките на Џонсон Мети во Бунарџик, која работи токму во сегментот во кој најмногу ќе се крати.
Џонсон Мети инвестира во чисти и одржливи технологии
Објавувајќи го извештајот за првиот квартал годинава од Џонсон Мети информираат дека планираат да ја забрзаат нивната стратегија за раст со инвестирање 400 милиони фунти до 2021 година со фокус на климатските промени и чисти и одржливи технологии.
„KОВИД-19 донесе невидени предизвици во светот и за Џонсон Мети. Нашиот бизнис е отпорен и диверзифициран, опслужувајќи повеќе пазари Направивме добар напредок во 2019-20 година и испорачавме оперативни перформанси малку пред очекувањата на пазарот, исклучувајќи ги ефектите на СОВИД-19 кои негативно влијаат врз основната оперативна добивка за околу 60 милиони фунти. Презедовме итни и решителни активности за да го заштитиме нашиот бизнис и да одржиме добра ликвидност и силен биланс на состојба “, рече Роберт МекЛеод, извршен директор ма Џонснон Мети з Ројтерс..
Но, на долг рок, растот на електричните автомобили предизвикува сериозен предизвик за Џонсон Мети.
Заради тоа Џонсон Мети уште пред неколку години ја започна својата транзиција кон почисти и пооодржливи технологии.
Додека во двете фабрики во слободната зона Бунарџик 1 се произведуваат катализатори за прочистување на издувни гасови од автомобилите кои работат на дизел и бензин, компанијата минатата година почна да гради фабрика во Полска во која ќе се произведуваат батерии за електрични возила.
Во денеска објавениот финансиски извештај за првиот квартал од 2020 година Џонсон Мети вели дека има планови да биде и лидер во производството на хидроген, посочувајчи дека станува збор за голем пазар кој нуди големи можности и дека како компанија имаат конкурентна предност со уникатна поставеност во ланците на снабдување.
Ако се знае дека Германија со последниот пакет за поддршка на автомобилската индустрија предвиде субвенции за купување само на нови електрични автомобили, а не и за автомобили кои користат дизел или бензин, сосема е извесно дека ќе следи големо пренасочување кон производство на електрични автомобили и кој автомобили кои работат на хидроген.
Тоа секако нема да се случи за неколку години, но е процес кој е веќе почнатѕ.
Но, дилемата за која треба да се размислува е каква е иднинатата и што на среден рок ќе се случи со фабриката на Џонсон Мети во Македонија? Зошто Џонсон Мети не одлучил да гради фабрика за производство на батерии за електрични батерии во слободните зони каде што има многу поволности, туку во Полска?
Ако се знае дека Џонсон Мети е најголема компанија и најголем извозник во државата, со извоз од 2 милијарди евра во 2019 година( што е третина од вкупниот извоз на земјата), компанија во која се вработени 1.043 лица и која во 2018 година уплатила во државниот буџет 40 милиони евра на име на данок на добивка, добро би било навреме да се предвидат и анализираат сите опции.
