Светски познатата менаџмент и консултантска компанија A.T.Kearney објави листа на 10 најважни трендови кои ќе обликуваат 2020 година.
Анализирајќи ги демографијата, економијата, животната средина, геополитиката, управувањето, ресурсите и технологијата, студијата на AT Kearney открива можни случувања на кои компаниите треба да посветат поголемо внимание и соодветно да се подготват.
Ова е четврта година по ред во која A.T.Kearney објавува вакви предвидувања.
Минатата година 6 од 10 предвидувања беа оценети како 100% точни, 3 како 75% точни и 1 како 50% точно.
Во прилог се предвидувањата на A.T.Kearney за трендовите кои ќе ја обликуваат 2020 година:
Тренд #1
Војната меѓу генерациите ќе се вжештува
Бидејќи генерацијата Z (родени по 1995 година) и Милениумците (родени меѓу 1981 и 1995 година) доаѓаат на позиции на авторитет, нивниот судир со генерациите Baby Boomers (родени помеѓу 1946 и 1964 година) и Generation X (родени помеѓу 1965 и 1981 година) ќе продолжи да расте. Области каде што овој меѓу генерациски конфликт е веќе видлив се политиката, животната средина, домувањето и финансиите.
Тренд #2
Кризата со водата ќе поттикне многу иновации
Поплавите, недостигот на вода и нечиста вода за пиење стануваат вистински закани за повеќе од третина од светската популација. Ова треба да ги поттикнат владите да донесат закони и да воведат кампањи за да се надминат овие кризи. Исто така, се очекува да се појават низа иновативни стартапи, бидејќи приватниот сектор ќе се обиде да ги искористи овие итни потреби.
Тренд #3
Еволуцијата на градовите ќе го забрза исполнувањето на инфраструктурните и климатските предизвици
Недостигот на простор за домување, несигурноста на храната, лошите системи за транспорт и загадувањето се само неколку важни проблеми за градовите низ целиот свет. Сите овие проблеми се тесно поврзани со два главни проблеми: нееднаквоста и климатските промени. Исто така, брзото проширување на урбаните центри резултира во губење на обработливо земјиште. Владите и приватниот сектор треба да започнат да работат заедно за да се борат против нееднаквоста и климатските промени.
Тренд #4
Нова економија поттикната од честите катастрофи
Стартапите веќе започнаа да се појавуваат со услуги за помош при природни непогоди. Ова ќе продолжи и во 2020 година, бидејќи катастрофите, природни и човечки, се неизбежни – што резултира во нов сектор за помош при катастрофи во глобалната економија.
Меѓународните организации ќе започнат да се потпираат на овие приватни субјекти за да им понудат олеснување на погодените области. Нови технологии за помош и превенција ќе бидат понудени, а сè повеќе инвестиции ќе бидат алоцирани од стартапи.
Тренд #5
Халал потрошувачкиот пазар ќе надмине 2,5 трилиони долари на глобално ниво
Околу 25% од глобалното население ја следи муслиманската вера и ова претставува огромен дел од глобалниот пазар на потрошувачи. Муслиманите потрошиле околу 2,1 трилиони долари само во 2017 година и се огромна можност за бизнисите на халал пазарот. Заедно со храната, што претставува 62% од вкупниот пазар на халал пазарот, постојат неколку други сектори за брзо растечки производи за халал производи и услуги, како што се модата, медиумите и рекреацијата, патувањата, фармацијата и козметиката. Во 2020 година, се очекува халал пазарот да надмине вредност од 2,5 трилиони американски долари.
Тренд #6
САД ќе се соочат со предизвици во трката до 5G
Кина ја објави својата намера да го направи 5G приоритет, со тоа што Huawei и ZTE веќе пуштаат 5G компатибилни производи на кинескиот пазар. Другите азиски земји како Јужна Кореја, Јапонија или Сингапур и ЕУ се исто така во трка за имплементација на 5G. Ова ќе ја заостри конкуренцијата, бидејќи компаниите со седиште во САД ќе се соочат со нови предизвици во трката за 5G.
Тренд #7
Правилата за приватност на податоците ќе се зголемуваат бидејќи регулативите на ЕУ го поставуваат глобалниот стандард
Земјите ширум светот ќе донесат нови закони за приватност на податоците во 2020 година, бидејќи компаниите се соочуваат со сè поголем надзор од јавноста и политичарите. Европската GDPR регулатива ќе стане стандарден образец за ваквите закони и компаниите ширум светот ќе наидат на уште поголем притисок за да обезбедат усогласеност со новите регулативи.
Тренд #8
Североисточна Азија ќе стане уште поголемо геополитичко жариште
И покрај тоа што во моментов не е големо жариште како Средниот Исток или Латинска Америка, Североисточна Азија сигурно почнува да изгледа како едно ново растечко жариште, со тоа што Јапонија и Јужна Кореја моментно се во конфликт поврзан со трговската размена, Кина и Русија го откриваат своето ново хиперсонично оружје, Северна Кореја открива нова ракета способна за подморници, а тука се и масовните протести во Хонг Конг и Тајван.
Тензиите само ќе ескалираат во 2020 година, при што тензиите меѓу Пекинг, Хонг Конг и Тајпеј ќе растат секој ден, исто како и горчината на Јапонија и Јужна Кореја, или амбициите на Северна Кореја.
Тренд #9
Апрецијацијата на американскиот долар ќе продолжи
Американскиот долар остана силен во 2019 година, и покрај намалувањето на каматните стапки од страна на Федералните резерви. Доларот ќе остане силен и во текот на 2020 година и ќе добие импулс во однос на другите главни валути.
Тренд #10
Комерцијалните и националните интереси ќе се судрат во надворешниот простор
Исто како и истражувањето на нашата планета во претходните векови, кога државните организирани експедиции го отворија патот за приватните претпријатија, при што дојде до меѓусебен судир, вселенското истражување ќе забележи зголемена конкуренција помеѓу националните и приватните интереси.
Регулаторните проблеми со вселената ќе станат главна точка на разговор на мултилатералните собири, додека повеќе земји и приватни компании се подготвуваат за свои вселенски мисии. Најверојатно, напорите за регулирање на истражувањето на вселената ќе бидат неплодни во 2020 година, како резултат на зголемените геополитички тензии.
