Американскиот претседател Џо Бајден објави дека САД и официјално го забрануваат увозот на нафта од Русија, како дел од санкциите против Русија заради воената инвазија на Украина.
„САД цели кон таргетирање на главната артерија на руската економија. Ние нема да бидеме дел од субвенционирањето на војната на Путин“, изјави претседателот Бајден во своето денешно обраќање пред јавноста.
„Руската агресија нè чини сите нас“, рече Бајден, предупредувајќи на очекуваното зголемување на цените на нафтените деривати.
Увозот на нафта и нафтени деривати во САД од Русија учествува со околу 8% во вкупниот извоз на овие производи.
Велика Британија исто така денеска соопшти дека ќе го забрани увозот на руска нафта до крајот на 2022 година, потег што се очекува да биде реализиран постепено во период од една година. Британците засега нема да го забранат рускиот гас. Увозот на нафта од Русија покрива околу 8% од потребите на Британија.
Овие одлуки се дел од меѓународните санкции кон Русија заради воената инвазија врз Украина, што предизвика многу западни земји да го напуштат рускиот пазар, како и исклучување на руски банки од Swift системот.
Другите европски земји кои повеќе се потпираат на руските горива нема да учествуваат. Според податоците дури 27% од потребните нафта и и гас ЕУ се увезуваат од Русија.
Европската комисија, пак, објави планови за да ја намали зависноста на ЕУ од рускиот гас за две третини оваа година и да ја прекине нејзината зависност од руските испораки на гориво „до 2030 година“.
„Едноставно не можеме да се потпреме на добавувач кој експлицитно ни се заканува“, рече претседателката на Европската комисија Урсула фон дер Лајен во соопштението за печатот со кое го објави планот.
Германскиот канцелар Олаф Шолц ги отфрли повиците да се забрани увозот на руски гас и нафта, како дел од новиот пакет западни санкции против Москва поради инвазијата на Украина.
Во соопштението, Шолц предупреди дека таквиот потег може да ја загрози енергетската безбедност на Европа и дека увозот на енергија од Русија во моментов е суштински за секојдневниот живот на граѓаните.
Според него, Европа намерно направи исклучок на санкциите за снабдувањето со енергија од Русија.
„Европското снабдување со енергија за производство на топлина, транспорт, електрична енергија и индустрија во овој момент не може да се обезбеди на друг начин. Тоа е суштинско за обезбедувањето јавни услуги и секојдневниот живот на нашите граѓани“, истакна Шолц.
Во меѓувреме, Русија предупреди дека може да го затвори својот главен гасовод „Северен тек 1“ кон Германија, откако Берлин го запре одобрувањето на втората линија преку Балтичкото Море како одговор на руската инвазија на Украина.
Русија е главниот снабдувач на Германија, која ја снабдува најголемата европска економија со нешто помалку од една третина од потребниот гас.
