Од денеска започнува примената на т.н. „зелени коридори“ кои подразбираат забрзана правна и здравствена процедура на граничните премини Табановце, Блаце и Ќафасан, што ќе бидат отворени за превоз на стока 24 часа седум дена во неделата.
Најавата на пристигнувањето на стоката на граничните премини ќе се врши преку Електронскиот систем за размена на податоци помеѓу царинските администрации во рамките на ЦЕФТА.
Земјите членки на ЦЕФТА ја одобрија и листата на основни производи на кои треба да се даде приоритет кога станува збор за прекуграничниот транспорт и трговија преку “зелените” коридори, со цел да се обезбеди соодветно снабдување во услови на кризата со Ковид-19. На листата на стоки кои треба да имаат приоритет се храна и основни прехранбени продукти,како и медицинска опрема од листа на Светската царинска организација.
Во зависност од потребите, листата со стоки може да се менува, а постепено ќе се зголемува неговата примена заедно со исполнувањето на условите на определени гранични премини.
Системот за електронска размена на податоци е надграден со цел поддршка на олеснувањето на транспортот и трговијата со основни стоки за време на справување со COVID-19.
Протокот на стоки ќе биде обезбеден преку 24 часовна работа на одредените гранични премини, кои покрај „зелените коридори“, остануваат отворени за работа и за секоја друга стока.
На следните линкови можете да ги погледнете листата со основни стоки за кои ќе важат зелените коридори и граничните премини кои ќе функционираат по овој режим:
–ЦЕФТА-ЛИСТА НА НЕОПХОДНИ СТОКИ
– ПРЕГЛЕД НА ФУНКЦИОНИРАЊЕТО НА ИНТРА-ЦЕФТА ГРАНИЧНИ ПРЕМИНИ
– ПРЕГЛЕД НА САНИТАРНИТЕ МЕРКИ КОИ СЕ ПРИМЕНУВААТ НА ГРАНИЧНИТЕ ПРЕМИНИ ВО ЦЕФТА РЕГИОНОТ
