Германското Министерство за финансии планира да им понуди на компаниите пакет даночни олеснувања од околу 6 милијарди евра (6,61 милијарди долари) годишно во услови на тешка економска средина, велат извори од министерството.
Германскиот деловен морал се влошува, што укажува на тоа дека најголемата европска економија ќе се бори да се ослободи од рецесијата.
„На економијата и треба стимул – ретко кога ова беше толку итно како сега“, напиша министерот за финансии Кристијан Линднер во средата на Твитер.
Планот за даночни олеснувања ќе биде дел од нацрт-законот за можности за раст, кој Линднер го предложи да ја направи Германија поконкурентна како деловна локација во услови на губење на привлечноста поради високите цени на енергијата и оптоварената бирократија.
Нацрт-законот вклучува вкупно речиси 50 мерки за даночна политика, главно насочени кон малите и средни претпријатија, велат изворите.
Има и одредба за поттикнување на компаниите да инвестираат во заштита на климата.
Ова ќе им понуди на компаниите одредени даночни поволности меѓу 2024 и 2027 година, доколку направат инвестиции поволни за климата, велат изворите.
Пакетот на Линднер обезбедува и посилни даночни стимулации за истражување. Тоа, исто така, ќе им овозможи на компаниите да надоместат повеќе загуби со добивката од другите финансиски години и ќе овозможи побрзо преземање на отписи за средства со мала вредност.
Федерацијата на германска трговија на големо, надворешна трговија и услуги (БГА) ги поздрави плановите. „Поедноставувањето на даноците и подобрите опции за амортизација се важни стимулации за повеќе инвестиции во Германија“, рече претседателот на BGA, Дирк Јандура.
Извор: Ројтерс
