Денес се одржа јубилејното 10то издание на „ТОП 100“ настанот на кој беа прогласени најдобрите и најуспешните 100 компании. Стопанската Комора на Северо-Западна Македонија во хотелот „DoubleTree by Hilton“, преку хибридна презентација ги презентираше најмоќните компании, кои во изминатата година прикажале позитивни резултати.
За време на „ТОП 100“ настанот, Стопанската Комора на Северо-Западна Македонија додели награди на ТОП 5 компании, кои имаат посебно достигнување во своето работење и се издвојуваат како водечки компании за 2019 година, како и три специјални награди.
За изборот на овие водечки компании, пресудни се неколку индикатори, како што се годишниот приход кој го прикажуваат, нето-добивката, бројот на вработени, инвестициите и повратот на капитал, со што истите се издвојуваат од останатите од каталогот.
Првата награда и припадна на компанијата Даути Комерц, втората награда на компанијата Алма-М, третата награда на компанијата Пофикс, четвртата награда на компанијата Бас Тути Фрути и петтата награда на Киппер. Компанијата АК-ИНВЕСТ ја освои наградата за најбрзо растечка компанија, Едукативниот центар РЕА ја освои наградата за компанија предводена од жена, а компанијата Кнауф Радика ја освои наградата за компанија со успешно партнерство.
Наградите ги доделија претставници на Стопанската Комора на Северо-Западна Македонија, односно Неби Хоџа, Мендерес Кучи, Трим Ќемали и Влора Адеми, како и претставници од Владата на Република Северна Македонија, премиерот Зоран Заев, Талат Џафери и Крешник Бектеши. Една од наградите беше доделена од страна на гостин, односно г. Николин Јака од Стопанската Комора на Тирана.
Претседателот на СКСЗМ рече дека помина една деценија откако овој настан почна да се организира, при што како Комората така и нејзините членови постојано растеа, а ТОП 100 доби друга димензија како моќен бренд на СКСЗМ, кој самите членови го создадоа, воспоставија и развија во текот на 15-годишното патување на Комората.
„Горди сме на фактот дека станавме синоним за подадена рака и чадор за сместување на бизниси. Ги поддржуваме државните институции во нивните напори за трансформација и унапредување на развојните политики во земјата, особено придонесувајќи за создавање на подобра деловна клима во земјата.“
Тој истовремено изрази сочуство за загубата на г-дин Енвер Малиќи, еден од најголемите основачи и поддржувачи на Комората, симбол за успешен претприемач и дарежлив филантроп.
Јубилејниот 10ти настан за презентација на каталогот „ТОП 100“ беше од затворен карактер, поради почитување на сите мерки и препораки, истиот беше и организиран согласно истите, а преносот од настанот се одвиваше во живо преку социјалните мрежи, на три различни јазици – македонски, албански и англиски.
Стопанската Комора на Северо-Западна Македонија се стреми кон постојано промовирање на овие компании, кои имаат потенцијал за нови инвестиции, создавање на нови работни места, зголемување на корпоративната одговорност, како и зголемено влијалние врз економскиот и социјалниот развој на нашата држава.
Настанот „ТОП 100“, кој несомнено станува традиција, ќе продолжи и понатаму да ги мотивира компаниите да го вложуваат максимумот во своето работење.
Заев: Владата посветено создава уште поголеми поволности за поддршка на приватниот сектор
На денешниот настан се обратија и премиерот Зоран Заев и министерот за финансии фатмир Бесими.
„Изборот на најуспешни компании е признание за нивната успешна работа, мотив за понатамошни остварувања, но исто така и признание за нивната општествена улога. Оваа манифестација е силен поттик за претпријатијата кои оствариле најдобри резултати во претходната година, да продолжат во создавање на култура на деловна мотивираност и промовирање на здрава конкурентност. Сето тоа влијае на подобрување на продуктивноста, зголемување на бројот на вработените, како и севкупен економски раст”, рече претседателот на Владата на Република Северна Македонија, Зоран Заев во своето обраќање на промоцијата на ТОП 100 најуспешни компании на Стопанската комора на северо-западна Македонија упатувајќи честитки за јубилејот 15 години постоење на комората и 10 годишнината од најголемиот ТОП 100 настан.
Министерот за финансии Фатмир Бесими, истакна дека заедно со коморите продолжува соработката за заштита на економијата и економското закрепнување, кое ќе гарантира поголем забрзан економски раст.
„Нашата амбиција во владината програма и мојата задача како министер за финансии во соработка со вас, а и во мандатното писмо, беше да го удвоиме економскиот раст од 2 на 2,5% во последните 10 години за да биде над 4-5% во наредниот период.
Затоа, проекциите во Буџетот од 2021 година со 5-годишна рамка се дека следната година да бележиме раст од 4,1% на БДП, да продолжиме во 2022 година со 4,6% и во 2025 година да достигне 5,9% на растот, преку стратегија за економско закрепнување и забрзан раст SmarterGrowth”, истакна Бесими.
На промоцијата присуствуваа и претседателот на Собранието Талат Џафери, првиот заменик-претседател на Владата и министер за политички систем и односи меѓу заедниците Артан Груби, министерот за економија Крешник Бектеши, претседатели на коморите, како и членови на одборот на Стопанската комора на северо-западна Македонија.
Согласно податоците на Стопанската комора на северо-западна Македонија, во 2018 година, годишниот обрт на ТОП 100 најуспешни компании е речиси 750 милиони евра, додека во 2019 година тој износ е еднаков на околу 900 милиони евра. Во 2018 година реализираната нето – добивка на најуспешните 100 компании беше 56,5 милиони евра, а според податоците за 2019 година, нето – добивката на најуспешните 100 компании, достигна близу 70 милиони евра.
Она што е посебно значаен податок е што расте и бројот на вработени. Во 2018 година бројот на вработени во ТОП 100 најуспешни компании беше 8.693, а заклучно со 2019 година, најуспешните 100 компании вработуваат околу 9.000 лица.
