КОЛУМНА
Кочо Анѓушев, претседател на Македонската енергетска асоцијација
Годината која е зад нас ја оценувам како најпредизвикувачка година за стопанството по Втората светска војна. Предизвикот за бизнисот во 2022 година беше огромен, од една страна поради ескалација на енергетската криза, а од друга страна, од кумулативните проблеми кои се собираа и во претходните две години за време на „Корона кризата“.
Во 2022 година сите ние и граѓаните и стопанството видовме што значи да си енергетски независен, односно во случајот со Република Северна Македонија енергетски зависен и сега разбравме што значат нереализираните проекти во енергетиката во последните 30 години, ако го земеме предвид само периодот по независноста.
Ние во МЕА направивме рана детекција на предизвиците и предложивме конкретни мерки за да се ублажи кризата, добар дел од нив беа прифатени и со нив успеавме делумно да го амортизираме ударот од цените на електрична енергија.
Ако може да истакнам нешто позитивно, ме радува тоа што се олеснија условите за изградба на фотоволтаични централи на крововите на индустриските објекти и што се зголемува инсталираниот капацитет на обновливи извори на енергија, но и тоа што надлежните органи ги прифатија нашите совети за максимизирање на домашното производство на енергија, но за жал со таа енергија се помогна само на домаќинствата и малите компании кои се на регулиран пазар.
Компаниите кои се на слободен пазар, а кои се носители на економското работење во државата, не добија никаква помош. Имајќи предвид дека во сите земји во регионот стопанството беше целосно помогнато, македонските компании изгубија на конкурентност.
Не би сакал да употребувам празни фрази за честитка и убави желби за 2023 година, затоа што мислам дека тоа во овој момент не ни е потребно. Не чека уште една непредвидлива и полна со предизвици година. Би сакал да ги поттикнам сите чинители, граѓаните, стопанството, државните органи, да продолжат да спроведуваат проекти со кои ќе го реформираме енергетскиот систем. Да инвестираме во диверзифицирани обновливи извори на енергија и да ги користиме максимално природните потенцијали на нашата земја.
Енергетските проекти не се приказна од еден ден, еден месец или една година. Енергетиката е приказна која трае и за реализација на секој еден енергетски проект е потребно многу време.
Да создадеме сите заедно една убава енергетска приказна во Северна Македонија, но тоа може само со јасен план, многу работа и целосна посветеност на целите, а не на проблемите. Енергетската независност мора да биде наша цел и сите треба да работиме за да ја оствариме.
