По пожарот што сериозно го оштети дел од имотот, опремата и капиталот на фабриката Макпрогрес Виница, Стопанската комора на Северна Македонија иницира обединета бизнис акција за поддршка на компанијата — еден од највлијателните домашни производители и извозници.
Во петок, 12 септември 2025 година, претседателот на Комората, Бранко Азески, ќе одржи состанок со претставници од водечките малопродажни ланци, на кој ќе се дефинира форма на кампања преку која ќе се засили продажбата на производите на Макпрогрес. Станува збор за брендови со докажан квалитет и препознатливост: Винчини, Сончева Долина, Натура, Дониа, Фантазиа, како и производи под приватни трговски марки.
Целта на кампањата е јасна: Да се поттикне домашната потрошувачка и да се обезбеди стабилност на фабриката, со што ќе се зачуваат сите работни места и ќе се спречи негативен социо-економски ефект врз вработените и нивните семејства.
Претседателот на Макпрогрес, Глигор Цветанов, лично ќе го презентира концептот за идното работење на компанијата и деталите за настанот во саботата, пред присутните на состанокот во Комората.
Солидарност што инспирира
Во само два дена по пожарот, јавноста реагираше со масовна поддршка преку социјалните мрежи. Индивидуалци, инфлуенсери и јавни личности повикуваат на купување на производите на Макпрогрес — создавајќи позитивен амбиент кој ретко се гледа.
„Солидарноста која ја видовме деновиве, уште еднаш потврди дека Македонија знае да застане заедно кога е најтешко,“ – изјави Глигор Цветанов.
Да бидеме солидарни и сплотени
Макпрогрес не е само фабрика — тоа е симбол на македонскиот квалитет, извозна сила и работна стабилност. Поддршката за нивните производи е директна поддршка за домашната економија.
Да купуваме македонски производи. Да го поддржиме Макпрогрес. Да застанеме заедно.
