Ретки се производите каде Македонија може да се пофали дека е нето извозник, односно дека повеќе извезува, отколку што увезува.
Еден таков производ е сладоледот. Податоците покажуваат дека во првата половина годинава од Македонија е извезен сладолед (тарифа 2105) во вредност од 9 милиони евра (9,8 милиони долари), што е зголемување во однос на истиот период лани од 12,2% или за околу еден милион евра.
Во истиот период годинава во земјава бил увезен следолед во вредност од 6,7 милиони евра (7,2 милиони долари).
Тоа покажува дека Македонија кога станува збор за сладоледот е нето извозник , односно повеќе извезува, отколку што увезува.
И тоа е така веќе трета година по ред. Ако се анализираат податоците за извозот и увозот на сладолед во изминатите пет години, може да се види дека Македонија во пандемиската 2020 година за прв пат имала поголем извоз ( 11 милиони евра) од увоз на сладолед (8,7 милиони евра). Истото е случај и изминатата 2021 година кога од земјава бил извезен сладолед вреден 15,7 милиони евра, додека во истиот период е увезен сладолед во вредност од 9,4 милиони евра.
Најголем производител и извозник на сладолед во земјава е домашната компанија Цермат од Битола, која покрај сладолед во својата производна програма има и кондиторски производи, замрзнат зелечук, производи од лиснато тесто.
Компанијата Цермат е меѓу најголемите извозници во земјава, а во минатогодишната едиција Топ 100 Извозници беше рангирана на 54 место со извоз вреден близу 10 милиони евра. Домашната компанија Цермат од Битола своите производи ги извезува во 26 земји на Балканот и светот.
Извозот на сладолед зголемен два и пол пати за пет години
Извозот на сладолед бележи континуиран раст во последните пет години. Така, во 2017 година од Македонија бил извезен сладолед во вредност од 5,6 милиони евра. Секоја гоодина извозот бележи раст за да во 2021 година достигне 13,2 милиони евра, што е раст од 135% или за 7,5 милиони евра во изминатите пет години.
Велика Британија најголем извозен пазар за македонскиот сладолед
Најголем дел од македонскиот сладолед минатата година се продавал во Велика Британија, каде лани е остварен извоз од околу 4,2 милиони евра. Втор најголем извозен пазар за сладолед бил Косово каде лани е остварен извоз од 2.5 милиони евра. Следат Австрија со извоз од 1,6 милиони евра, Австрија со извоз вреден 720 илјади евра, Албанија со извоз на сладолед вреден 577 илјади евра, Србија со извоз од 553 илјади евра и Германија со извоз од 511 илјади евра.
Најголем извозник на сладолед од регионот е Словенија
Ако се споредат количините и вредноста на сладолед кои се извезуваат од Македонија, тие се се уште многу помали во споредба со земјите од регионот. Најголем извозник на сладолед во регионот е Словенија која лани со извоз вреден 101 милион долари била 12-ти најголем извозник во светот. Србија минатата година имала извоз на сладолед од 75 милиони долари и била 14-ти најголем извозник во светот.
Следат Грција со извоз од 34 милиони долари, Хрватска со извоз од 27,4 милиони долари . Македонија е рангирана на 42 место на листата најголеми извозници, а зад нас е Бугарија која лани извезла сладолед во вредност од 5,8 милиони долари.
