Организацијата за храна и земјоделство на Обединетите нации (ФАО) денеска објави дека референтните светски цени на храната останаа непроменети во јуни, бидејќи зголемувањето на меѓународните котации за растителни масла, шеќер и млечни производи го неутрализираа падот на цените на житарките.
Индексот на цените на храната на ФАО, кој ги следи месечните промени во меѓународните цени на прехранбените производи со кои се тргува на глобално ниво, во јуни изнесуваше во просек 120,6 поени, што е за 2,5 % пониско од вредноста во јуни 2023 година и за 24,8% пониско од максимумот во март 2022 година.
Индексот на цените на житните култури падна за 3% во јуни во однос на мај, при што се намалија цените за индустриските култури, пченицата и оризот. Оваа промена беше делумно поттикната од подобрените производствени изгледи во главните земји извозници.
Индексот на цените на растително масло се зголеми за 3,1 % во споредба со мај, поттикнат од зголемувањето на глобалната побарувачка за увоз од американскиот сектор за биогорива за соја и сончогледово масло.
По три последователни месечни падови, индексот на цените на шеќерот на ФАО се зголеми за 1,9% во однос на мај поради загриженоста за влијанието на неповолните временски услови и монсуните врз производството во Бразил и Индија.
Индексот на цените на млечните производи се зголеми за 1,2%, а меѓународните понуди за путер го достигнаа највисокото ниво во последните две години поради зголемената глобална побарувачка за краткорочни пратки поради силната продажба на мало, сезонскиот пад на испораките на млеко во Западна Европа и ниските залихи во Океанија.
Индексот на цените на месото беше речиси непроменет во јуни, бидејќи благото зголемување на цените на овчо, свинско и говедско речиси го компензира падот на меѓународните цени на живината.
