Македонските компании во јуни годинава извезле на странските пазари стоки во вредност од 694 милиони евра, што е за 50 милиони евра помалку во однос на јуни минатата година, или пад од 6,4%, покажуваат податоците од Државниот завод за статистика.
Количински, извозот на стоки имал уште поголем пад и во јуни биле извезени стоки за 12% помалку во споредба со истиот период лани.
Падот на извозот во јуни годинава е најголем од август 2020 година, или речиси три години. Во првата половина годинава ова е втор пад на извозот, по падот од 3,1% во април годинава.
Увозот, пак, во истиот период изнесувал 936 милиони евра, што е пад од 6,5% во споредба со јуни минатата година.
Покриеноста на увозот со извоз во јуни годинава изнесувала 74,2%, при што е остварен трговски дефицит од 241 милион евра.
Најголем извоз во јуни годинава е остварен со хемиски производи и материи во вредност од 197 милиони евра, кој е поал за 9% во споредба со јуни 2022 година.
Втора најголема ставка е ивозот на машини и транспортни уреди во вредност од 195 милиони евра, раст од 17,3% во споредба со лани.
Извозот на електрични машини и апарати во јуни годинава изнесувал 108 милиои евра, раст од 8,5% во споредба со јуни лани.
Извозот на друмски возила изнесувал 53 милиони евра, што е раст од 33% во споредба со лани.
Извозот на железо и челик изнесувал 44 милиони евра, намалување од 39,4% во споредба со извозот ланскиот јуни.
Во јуни годинава извезена била храна во вредност од 40 милиони евра, што е речиси исто ниво како и лани.
Извозот на суровини изнесувал околу 30 милиони евра, намалување од 28% во споредба со лани.
Извозот на лекови и фармацевтски производи изнесувал 12,3 милиони евра и бележи раст од 8,8%.
Во првите шест месеци од земјава биле извезени стоки во вредност од 4,2 милијарди евра, што е за 3,8% повеќе во споредба со истиот период лани.
Во истиот период биле увезени стоки во вредност од 5,5 милијарди евра, што е пад од 7,4% во споредба со првата полвина од 2022 година. На страната на увозот најголемо намалување од 31% има кај вредноста на увезените нафтени деривати и енергенси, и кај увозот на суровините кој е помал за 30% во споредба со првата половина од 2022 година. Трговскиот дефицит во првите шест месеци изнесувал 1,3 милијарди евра, што е намалување од близи 32% во споредба со истиот период лани.
