Владата во Италија, предводена од премиераката Џорџиа Мелони, планира да примени еднократен данок од 50% следната година на вишокот приход на енергетските компании кои имале корист од порастот на цените на нафтата и гасот, покажува нацртот на владиниот буџет за 2023 година, пишува Ројтерс.
Со стапка од 50% ќе биде оданочен делот од корпоративниот приход во 2022 година, што е најмалку 10% повисок од просечниот приход на компаниите пријавен помеѓу 2018 и 2021 година. Плафонот е поставен на 25% од вредноста на нето средствата на крајот од 2021 година.
Шемата е различна од начинот на кој беше наведен од Министерството за финансии минатата недела. Таа верзија предвидуваше данок од 35% што ќе трае од јануари до јули 2023 година и се пресметуваше на нето добивката на енергетските компании, наместо на приходот како во последниот нацрт.
Италија очекува да собере околу 2,56 милијарди евра од данокот.
Според новите услови поставени во буџетот, кој сè уште не е официјално објавен, околу 7.000 производители и продавачи на електрична енергија, природен гас и бензински производи треба да го платат износот до средината на 2023 година.
