Компанијата Костал објави дека во јули годинава стартува нов инвестициски проект во Македонија вреден 50 милиони евра, кој ќе значи петкратно зголемување на приходите на компанијата и над 300 нови вработувања.
Станува збор за инвестиција во висока технологија и опрема за производство на комплексна електроника за најновите модели на хибридни и електрични возилата на Volkswagen и Мерцедес.
Eкслузивно за глобалното производство на Volkswagen, само на едно место и тоа во фабриката во Македонија ќе се произведуваат новите on board полначи кои ќе се вградуваат во сите електрични и хибридни возила на брендовите од групацијата Volkswagen. Станува збор за најкомплексен полупроизвод кој се произведува во Македонија, а кои директно ќе се вградува во најновите модели на Volkswagen, вториот најголем производител на автомобили во светот и најголем производител во Европа.
Исто така, годинава во фабриката на Костал во Македонија, ќе почне и производство на понови модели на кровни модули кои ќе се вградуваат во возилата на Mercedes, како и производство на новата иновативна SkinTec технологија кои ќе ја користат најексклузивните модели на Mercedes, соопштија генералниот менаџер на компанијата Виктор Мизо, главниот оперативен директор на КОСТАЛ аутомотив и претседател на КОСТАЛ за Европа Хансјоерг Херман и Кристијан Клајн извршен потпретседател за човечки ресурси во групацијата на средбата со македонски новинари кои имаа можност да ги разгледаат најновите високотехнолошки производни технологии инсталирани во дел од просториите на поранешната фабрика ЕМО, каде повеќе од шест години Костал произведува високотехнолошки автмобилски делови за познатите брендови Volkswagen, Porsche, Mercedes, Jaguar, Audi, Landrover и др.
Со најновата инвестиција ќе се отворат нови најмалку 300 работни места во фабриката во охридски Косел, со што вкупните инвестиции на Костал во земјава ќе достигнат 160 милиони евра.
Со новата инвестиција, Костал Македонија ќе биде најголема германска инвестиција во земјава во производствениот сектор, односно втора најголема во производна дејност после Џонсон Мети.
Бројот на вработени од сегашните 1.100 вработени, до 2026 година ќе се зголеми на 1.500, од кои најголем дел ќе бидат инженери и техничари.
“Од јули годинава до крајот на 2026 година ќе се инвестираат 50 милиони евра и тоа само во нова технологија и нови производи линии, а не во објекти. Со досегашните инвестирани 110 милиони евра, ќе стигнеме 160 милиони евра реално инвестирани во земјава. Преземаме обврска за минимум 300 нови вработувања, иако сметаме дека ќе бидат и повеќе од ова. Од минатогодишните околу 100 милиони годишен обрт планираме до крајот на оваа декада да стигнеме до обрт од 650 милиони евра обрт, што значи дека би се зголемиле и би пораснале повеќе од 5 пати и ќе бидеме една од компаниите кои креираат најголема додадена вредност за економијата”, изјави Виктор Мизо, генерален директор на Костал Македонија.
Со тоа Костал Македонија би станал втор најголем извозник од земјава, после Џонсон Мети.
Во блиска иднина, вели Мизо, планираме да имаме и дополнителен центар за развој и за креирање на производните линии.
Она што е исто така од значење за домашната економија, потенцира тој, е што од година во година се зголемува и обемот на локални набавки, кои од 12,7 милиони евра во 2022 година ќе достигнат 15 милиони евра во 2024 година. “Набавката, пак, на суровини и репроматеријали од ланските 1,6 милиони евра ќе достигнат 6,2 милиони евра во 2024 година. На пример, за алуминиумските куќишта за новиот систем за електричните и хибридни возила на Фолксваген соработуваме со ЛТХ Леарница од Охрид. Потоа соработуваме со Теламон, со ТТ Пласт и со други фабрики од Србија, Бугарија”, објаснува Мизо.
Македонија е важна локација за групацијата Костал
Хансјоерг Херман, оперативниот директор на групацијата Костал потврдува дека Македонија е многу важна како локација за компанијата. Досегашната соработка со македонските власти ја оценува како генерално добра, иако имало и некои работи кои не оделе толку добро.
Сепак, најголемата заслуга за успехот на Костал во Македонија, како и на одлуката да се инвестираат толку голема суми на пари во една локација, ја препишува на силниот локален менаџерски тим.
Според Херман, војната во Украина е еден од најголемите ризици во работењето за европската автомобилска индустрија, додека стабилноста во синџирите на снабдување и преминот кон електрични автомобили исто така носат одредена несигурност во индустријата, но дека Костал е подготвен за идните предизвици, кои носат можности и за Македонија.
Според Мизо, во односите со Владата има позитивни и негативни работи. Тој потенцира дека компанијата, но и општо странските инвестиции во земјава добиле поддршка од државата со усогласување на царинските стапки и адаптирање на целиот процес на државна помош и потенцирање на регионалниот аспект на инвестициите.
“Но, постојат некои работи кои сметам дека треба да се подобрат. Има договорни обврски за инфраструктурата кои требаше да бидат исполнети од државата уште пре неколку години, а кои се уште не се завршени. Има и некои работи кои се важни за сите компании, не само за Костал, а кои се однесуваат на употреба на сметководствените стандари за тоа што се смета за инвестициски трошок, за што сите компании треба да имаат ист третман без разлика дали се во или надвор од зоните”, додава Мизо.
И секако кога се зборува за исполнување на обврските на државата не може, а да не се потенцира лошото и небезбедно патно поврзување на Охрид со Скопје и големото доцнење во изградбата на најавениот автопат Кичево-Охрид, што секако им создава проблеми и на бизнисите и на сите граѓани.
На пример, производите кои се произведуваат во охридската фабрика на Костал се извезуваат и транспортираат на странските пазари со камиони, односно преку патен транспорт. На еден камион да стигне од Костал до македонско-српската граница му се потребни пет и пол часа за да ја помине раздалеченоста од околу 220 километри. Отприлика за истото време камионот поминува и околу 600 километри за да стигне од македонската до српско- унгарската граница.
Еден од проблемите со кои се соочуваат многу германски компании кои инвестирале во земјава е достапноста на квалификувана работна сила, посебно во време кога Германија ги олеснува условите за привлекување на странски работници и многу работници се исселуваат од земјата и регионо во економски најсилната европска држава.
Кристијан Клајн, извршен потпретседател за човечки ресурси во групацијата Костал вели дека предуслов за да се инвестира во фабрика во некоја земја е пристапот до луѓе кои се едуцирани и обучени и кои сакаат да се развиваат.
“Паметните компании ги прават двете работи. Привлекуваат талентирани луѓе во нивните претставништва во Германија и во земјите каде што имаат фабрики. Задоволни сме од квалитетот на едуцираните луѓе во македонските институции, а онаму каде што недостасуваат квалификации ги поддржуваме обуката и тренингот на луѓето. Костал е тука, што значи дека делумно одлуката да инвестираме во земјата била и заради тоа што пазарот на работна сила ни дозволувал да отвориме фабрика тука”, вели Клајн.
Германската компанија Костал постои 110 години, присутна е на 40 локации на пет континенти во светот, и вработува 16.800 лица. Изминатата 2022 година групацијата Костал имала вкупни приходи од 2,8 милијарди евра.
