Македонските компании во мај годинава извезле стоки во вредност од 603 милиони евра, што е пад за 21,6% или за 166 милиони евра помалку во споредба со мај минатата година, покажуваат последните податоци од Државниот завод за статистика.
Обемот на извезени производи во мај е помал за 4,6%, што упатува на тоа дека падот на извозот во поголем дел е заради намалените извозни цени.
Увозот, пак, во мај изнесувал 890 милиони евра и е за 9,7% помал во споредба со истиот месец лани.
Покриеноста на увозот со извоз во мај изнесувала ниски 67,8%, а трговскиот дефицит надмина 286 милиони евра.
Ако се анализира извозот по пазари, статистиката покажува дека извозот во Германија, најголемиот извозен пазар во мај годинава бележи голем пад од дури 29,3% во споредба со мај минатата година. Извозот во Германија во мај изнесувал 244 милиони евра и е за околу 100 милиони евра помал од мај минатата година. Количински, извозот во Германија бил помал дури 41,7% во мај во споредба со истиот период лани.
Покрај извозот во Германија, пад на извозот во мај има дури на 13 од 20-те најголеми извозни пазари. Извозот во Белгија е намален за 60%, извозот во Грција за 48,3%, во Унгарија за 31%, во Италија падот е 17,8%, во Косово за 8,6%…
Анализирано по групи на производи покажува дека најголем пад на извозот има кај странските компании кои работат во зоните и кои во најголем дел се поврзани со германската и европската автомобилска индустрија, но пад има и кај индустриите во кои работат претежно компании со домашен капитал.
Најголем извоз во мај од 147 милион евра е остварен со хемиски материи и производи, кој е помал за дури 37,9% во споредба со истиот месец лани. Следи извозот на електрични машини, апарати и делови од 114 милиони евра, кој е поголем за 4,6% во споредба со лани. Извозот на автобуси и други возила е помал за 63,7% во споредба со лани, извозот на облека бележи пад од 34,2%, кај извозот на обувки падот е 43,4%…
Извозот на железо и челик во мај изнесувал 42 милиони евра и е помал за 25,7% во споредба со истиот месец лани. Од извоз на храна се остварени приходи од 39 милиони евра, пад од 10% во споредба со истиот месец лани, при што извозот на зеленчук и овошје бележи пад од 24,8% и изнесувал само 15 милиони евра. Извозот на кондиторски производи во мај изнесувал околу 10 милиони евра и е поголем за 8,4% во споредба со мај минатата година.
Пад има и кај извозот на пијалоци кои во мај изнесувал 9,4 милиони евра, пад од 7,8% во споредба со мај 2023 година. Извозот на тутун и тутунски производи е намален за 18,9% во мај и изнесувал 19,7 милиони евра.Извозот на медицински и фармацевтски производи изнесуал 12,6 милиони евра во мај годинава и е помал за 4,8% во споредба со лани. Извозот на минерални горива, нафтени деривати бележи пад од 42% и изнесувал 12,7 милиони евра.
Извозот во првите пет месеци годинава изнесувал 3,3 милијарди евра и е помал за 8,8% во споредба со истиот период лани. Увозот во истиот период изнесувал 4,6 милијарди евра и е поголем за 1% во споредба со увозот во периодот јануари-мај 2023 година. Трговскиот дефицит во првите пет месеци годинава изнесувал 1,4 милијарди евра и е за 34% поголем во споредба со истиот период лани.
Покрај големиот пад на извозот, статистиката измери и голем пад од 13,2% на индустриското производство во мај, што е најголе пад во последните три години.
Фото : Freepik
