Јован Деспотовски, директорот на Дирекцијата за Технолошки индустриски развојни зони (ТИРЗ), денеска во Тајван потпиша договор со менаџментот на конзорциумот „Јагео” за нова, досега најголема гринфилд инвестиција во Македонија досега.
„Јагео“ ќе произведува електро-компоненти за различни индустрии.
“Преговорите за инвестицијата траеа речиси една година, а земјава е избрана како најдобра во конкуренција со останатите од регионот и пошироко, посочи извршниот директор на „Јагео“, Дејвид Ванг.
„Со Северна Македонија имаме одлично искуство. Сепак, две работи беа клучни зошто ја одбравме за нашата инвестиција: увидовме дека е стабилна, со квалификувана работна сила, а и Владата беше максимално посветена и имаше исклучително позитивен однос кон нас. Тоа можеби беше и пресудно. Ни излегуваше секогаш во пресрет и тука беше за секој наш проблем“, изјави Ванг.
Деспотовски, нагласи дека денешното потпишување на Договорот е потврда дека со знаење, желба и истрајност, можеме да оствариме големи резултати.
„Процесот не беше воопшто лесен. Во конкуренција беа многу земји, меѓу кои Хрватска и Србија. Но, ние успеавме во таа трка и ние сме денеска тука, на оваа маса, да потпишеме договор. Со оваа инвестиција стануваме дел од мапата земји кои обезбедуваат витални компоненти за производители како „Тесла“ и „Епл“, подвлече Деспотовски.
Според него, компаниите во зоните вработуваат близу 17 000 лица, а влезот на “Јагео” ќе значи 30% плус работна сила од оваа бројка.
„Јагео“ е водечка мултинационална компанија за производство на електронски компоненти со силно глобално присуство и производствени капацитети во Азија, Европа и Америка со над 40.000 вработени ширум светот.
„Јагео“ индиректно е веќе присутна во Македонија преку американската компанија Кемет, која во земјава прв пат инвестираше во 2021 година, но во 2020 година беше преземена и стана дел од тајванската групација Yageo .
Електронските компоненти кои ги произведува „Јагео“ се користат во авионската и автомобилската индустрија, 5G и телекомуникации, индустрија, медицина, управување со енергија, зелена енергија и други области.
“Со новиот концепт на поттикнување инвестиции успеавме, да ја ставиме нашата земја високо на мапата инвестициски дестинации кои имаат капацитет и услови да реализираат висококвалитетни вложувања. Бројките најдобро зборуваат за тоа колку е ефикасен новиот концепт на инвестиции и поддршка на ивестициите во ТИРЗ. Последниве две години се постигнати договори од над 650 милиони евра, што е над половина од вкупниот обем на донесени инвестиции во претходните 10 години. Со оваа инвестиција надминуваме износ над 850 милиони евра“, изјави премиерот Димитар Ковачевски, кој честитките за новата инвестиција ги изрази вклучувајќи се преку видео конференциска врска.
