Од 24 ноември во Германија стапија на сила новите прописи според кои и возачите на камиони се обврзани да имаат Ковид сертификати или резултати од тест.
Како што објавува trans.info, возачите на местата на утовар ќе мораат да покажат Ковид пропусници или доказ дека немаат корона.
Правилата за 3G воведени од германската влада поради наглото зголемување на бројот на заразени, но и поради недоволната стапка на вакцинација на работоспособното население, предвидуваат на работниците да им биде дозволен влез во канцеларија, фабрика или друго работно место само доколку тие бидат вакцинирани против коронавирус, имаат прележано Ковид 19 или имаат доказ дека се негативни на корона вирус.
Работодавачите имаат обврска секојдневно да вршат и документираат проверки, а во случај на прекршоци казните можат да бидат и до 25.000 евра.
Новите мерки стартуваат од денеска 24 ноември, а ќе важат до 19 март 2022 година.
Употребата на PCR тестови и антиген тестови извршени во домашни услови, но под надзор ќе бидат прифатени, додека тестови купени од аптека и направени без надзор нема да се прифаќаат.
Германската логистичка индустрија е загрижена за последиците кои овие мерки со кои ќе се предизвика парализација на синџирите на снабдување.
Работата станува уште посложена кога станува збор за прекугранични испораки, бидејќи персоналот често се вакцинира со вакцини кои не се одобрени во ЕУ и не може да тестира пред испораката заради што ќе има големи прекини.
Заради тоа, од транспортната и логистичката индустрија бараат возачите на камиои да бидат изземени од новите мерки за ковид пропусници или задолжително тестирање.
