Извозот на изолирани жици и кабли од Македонија минатата 2023 година достигнал вредност од над 690 милиони долари (640 милиони евра). Во споредба со претходната година вредноста на извозот е зголемена за 9,3%, а обемот на извезени производи има годишен раст од 7%, покажуваат податоците од Државниот завод за статистика.
Станува збор за пполупроизводи кои се високо трудоинтензивни и кои се користат во автомобилската индустрија, односно во земјава ги произведуваат компании со странски капитал кои работат како добавувачи во синџирот на снабдување на германска и европска автомобилска индустрија.
Извозот на изолирани жици и кабли (тарифен код 8544, во кој влегуваат и сетови на спроводници за палење) лани учествувал со 11% во вкупниот извоз на земјата и се втор најизвезуван производ после катализаторите на Џонсон Мети.
Најголем дел од извозот (42% ) или 293 милиони долари биле наменети за Германија, што е 8% од вкупниот македонски извоз во најголемата европска економија. Следат Шпанија, каде лани биле извезени изолирани жици и кабли во вредност од 119 милиони долари, Словачка со извоз од 82,8 милиони долари, Унгарија со извоз од 64 милиони долари, Австрија со извоз од 37 милиони долари, Чешка со извоз од 10,8 милиони долари, Романија со извоз од 10,6 милиони долари, Бугарија со извоз од 10,5 милиони долари, Србија со извоз од 10,2 милиони долари и Турција со извоз од 9,7 милиони долари.
Најголем извозник на ова агрупа производи од Македонија е компанијата со германски капитал Кромберг и Шуберт, која има фабрики во Битола и Скопје.
Според најновата едиција ТОП 100 ИЗВОЗНИЦИ 2024, која ќе излезе на почетокот на ноември годинава, Кромберг и Шуберт е втор најголем извозник од Македонија, со извоз од над 315 милиони евра.
Според Worldtopexports, Македонија е трет најголем извозник на изолирани жици и кабли во регионот, после Србија со извоз од 2,1 милијарда долари и Бугарија со извоз од 739 милиони долари.
