Директорот на Делегацијата на германското стопанство во Северна Македонија, Патрик Мартенс, во денешната Утринска телеграма, предупредува дека во следниот период ќе мора да се соочиме со неочекувани удари кои ќе ја погодат економијата заради војната во Украина.
„Сите сме шокирани од војната која започна против Украина и страдањата кои му се нанесуваат на украинскиот народ. Отсега мора да се соочиме со неочекуваните удари кои ќе ја погодат економијата“, вели Мартенс.
Тој потенцира дека заради војната во Украина, германските производители во автомобилската индустрија се принудени да го стопираат своето производство.
“Ова ќе има директни последици и на компаниите производители од автомобилската индустријата во Северна Македонија. Поради Виша сила, им се заканува стопирање на производството на производителите од автомобилската индустрија кои се дел од интернационалниот синџир на добавувачи во Северна Македонија“, предупредува Мартенс.
Според Мартенс, во Украина се погодени 30.000 работни места кај германски и 10.000 работни места кај други меѓународни инвеститори од автомобилската индустрија.
Компаниите од индустријата за производство на автомобилски делови во земјава создаваат речиси половина од вкупниот извоз на државата и вработуваат околу 30 илјади лица.
Автомобилската индустрија се соочуваше со сериозна криза уште пред да почне војната во Украина, предизвикана заради недостигот на чипови, што резултираше со намалување и прекини на производството во многу автомобилски компании и пад во продажбите. Тоа се одрази и врз работењето на компаниите за производство на делови во земјата, кои произведуваат најмногу за германската автомобилска индустрија.
Последните податоци од Државниот завод за статистика покажаа дека во јануари годинава извозот на машини и транспортни уреди, каде доминираат автомобилските делови, има пад од 27,5% во споредба со истиот период лани.
