БДП на Романија може да достигне 700 милијарди евра во следните 10 години, 30 пати повеќе отколку во 1994 година. Со тоа Романија би влегла во Топ 10 економии во Европската унија.
Романската економија би можела да се удвои во следните десет години, а БДП да достигне вредност од 700 милијарди евра, со просечна стапка на раст од 3,0 – 3,5% годишно и слична просечна инфлација.
Еден од условите за исполнување на овие проценки е ефикасна апсорпција и искористување, во наредните години, од 28 милијарди евра достапни преку Националниот план за закрепнување и отпорност, се вели во извештајот објавен од ING Bank Романија.
„Економијата на Романија помина низ период на длабоки трансформации во последните 30 години, а БДП се зголеми од приближно 26,6 милијарди евра во 1994 година на речиси 357 милијарди евра во 2024 година. Структурните промени на економијата, инвестициите и пристапувањето кон Европската унија доведе до забрзан економски раст во последните три децении. Со темпо на реален раст на БДП од 3,0 – 3,5% во следните десет години, нашите проценки покажуваат дека романскиот БДП би можел да се удвои и да достигне 700 милијарди евра, што би значело дека Романија ќе биде меѓу првите десет најсилни економии во Европската унија“, вели Валентин Татару, главен економист на ING Bank Романија.
Извештајот на ING Bank Romania покажува дека, во последните 30 години, економскиот раст на Романија успеа да доведе до забележителни перформанси во споредба со оние на другите европски држави. На пример, ако во 1994 година БДП на Романија беше повеќе од три пати помал од тој на Португалија, во 2024 година романската економија ќе го надмине БДП на Португалија за приближно 30%.
Транзицијата кон пазарната економија во периодот 1990-2000 година, периодот на економски бум помеѓу 2000 и 2008 година (кога БДП на Романија забележа просечен годишен раст од 6,1%), финансиската криза и последователното економско закрепнување (2009-2014 година), посткризната експанзија (2014-2020) и постпандемиското закрепнување (2021-2024) беа главните фази на развојот на романската економија во последните три децении.
Анализата на ING покажува дека по 2000 година, и покрај силниот раст на платите, капиталниот приход (профит, закупнини, дивиденди, зголемување на средствата) порасна со повисока стапка од приходот од трудот. Така, влезот во Европската унија донесе просперитет особено за сопствениците на капитал и инвеститорите во недвижности. Во текот на изминатите 30 години, просечната нето плата се зголеми од еквивалент од 72 евра во 1994 година на над 1.000 евра во 2024 година.
Извор: Profit.ro
