Руската валута падна за повеќе од 28% на рекордно ниско ниво во почетокот на тргувањето во понеделникот, откако новата рунда на западни санкции го зголеми притисокот врз финансискиот систем на Русија како одговор на нејзината инвазија на Украина, пишува Financial Times.
Рубљата падна на речиси 118 во однос на американскиот долар, според податоците на Блумберг, по викендот кога рускиот претседател Владимир Путин ги стави своите нуклеарни сили во состојба на готовност, а САД и Европа ги воведоа своите најстроги санкции во обид да ја отсечат земјата од глобалниот финансиски систем.
Во обид да ги спречи последиците на пазарот, руската централна банка во понеделникот забрани странска продажба на руски хартии од вредност. Не беа дадени информации кога ќе биде укината забраната.
Централната банка, исто така, соопшти дека тргувањето на руските берзи нема да се отвори за утринската сесија и дека подоцна денеска ќе објави дали тргувањето со акции ќе продолжи. Референтниот индекс на земјата Moex падна за повеќе од 25% во текот на изминатата недела.
САД и европските сојузници ги засилија казнените мерки во саботата, замрзнувајќи ги девизните резерви на Централната банка на Русија, а исто така, се согласија да исклучат некои од руските банки од системот за пораки Свифт, кој е клучен дел од инфраструктурата за глобалните плаќања.
Во понеделникот, Централната банка ја зголеми основната каматна стапка на 20% од претходните 9,5% во вонреден потег со кој регулаторот испраќа порака дека „надворешните услови за руската економија се драстично променети“.
Централната банка исто така објави дека ќе ја зголеми ликвидноста со ослободување на 733 милијарди рубљи (8,78 милијарди долари) во резервите на локалните банки.
