Федералните резерви на САД во средата ги зголемија каматните стапки за прв пат од 2018 година, што е сигнал за затегнување на монетарната политика во борба против растечката инфлација. Зголемувањето е за четврт процентен поен, односно за 25 базични поени, од 0,25% на 0,5%, со што се зголемува клучниот репер за одредување на останатите стапки што се наплаќаат во економијата, а кои сега беа речиси на нула.
Но, уште позначајно, новите проекции на ФЕД покажаа дека креаторите на политиката се подготвени да ја префрлат својата борба со инфлацијата во голема брзина. Комитетот за операции на отворен пазар најави уште шест зголемување на каматната стапка годинава, па проценките се дека основната камтна стапка би можела да достигне 1,75% до 2% до крајот на годината. Тие предвидуваат дека следната година ќе се искачи на 2,8% – над нивото од 2,4 % за кое официјалните лица сега сметаат дека ќе работи за забавување на економијата.
“Eкономијата е доволно силна за да ги надмине зголемувањата на каматните стапки и да го одржи сегашниот силен раст на вработувањата и платите. ФЕД сега треба да се фокусира на ограничување на влијанието на зголемувањето на цените врз американските семејства”, изјави Џером Пауел, претседател на Банката на федерални резерви на САД.
Потрошувачките цени во САД се зголемија за 7,9% во февруари, што е највисоко ниво во изминатите 40 години.
Каматната стапка се зголемува за да се забави инфлацијата со тоа што ќе се ограничи побарувачката со тоа што го поскапува позајмувањето. Но, тоа исто така може да го забави економскиот раст и потенцијално да ја зголеми невработеноста.
Креаторите на политиката на ФЕД ја намалија проценката за растот на бруто домашниот производ за 2022 година на 2,8%, од 4% проектирани во декември, кога почнаа да ги анализираат новите ризици со кои се соочува глобалната економија. „Тоа е само рана проценка на ефектите од прелевањата од војната во Источна Европа, што ќе ја погоди нашата економија преку голем број канали“, рече Пауел. „Гледате повисоки цени на нафтата, повисоки цени на суровините. Тоа до одреден степен ќе влијае на БДП.
Но, барем засега, од ФЕД велат дека приоритет мора да биде стабилноста на цените.
Дури и со построгите зголемувања на стапката што сега се проектирани, ФЕД очекува инфлацијата да остане на 4,3% оваа година, паѓајќи на 2,7% во 2023 година и на 2,3% во 2024 година. Стапката на невработеност се гледа дека паѓа на 3,5% оваа година и останува на тоа ниво следната година, но се предвидува да се зголеми благо на 3,6% во 2024 година.
