Производителот на автомобили Stellantis ќе потроши повеќе од 200 милиони евра за производство на четири модели на автомобили од брендот Fiat во Алжир.
Изградбата на фабриката ќе биде завршена до август годинава со производство на првиот Fiat 500 Hybrid што се очекува до крајот на годината, се вели во соопштението.
До 2026 година фабриката ќе отвори речиси 2.000 локални работни места и ќе има производствен капацитет од 90.000 возила годишно.
„500 Hybrid ќе биде првиот Fiat што ќе се произведува овде, а потоа брзо ќе го следи Doblo, а за неколку години, сосема нов модел – сега сè уште во рацете на нашите дизајнери, кој ќе се произведува и во Алжир“, изјави извршниот директор на брендот Fiat, Оливие Франсоа.
Oд Стелантис велат дека Алжир е еден од клучните придонесувачи за нејзината цел да продава 1 милион возила годишно во регионот на Блискиот Исток-Африка до 2030 година, при што 70% од тие продажби доаѓаат од автомобили произведени во регионот.
Северно африканската држава Алжир има над 44 милиони жители. Деловната клима во Алжир беше тешка за производителите на автомобили кои се обидуваат да произведуваат возила таму. Во 2019 година, владата донесе многу непопуларни мерки кои влијаеа лошо на индустријата, но властите сега се трудат повторно да ја рестартираат автомобилската индустрија.
