Германската индустрија се соочува со најголем пад на вработеност во последната деценија. Според новата анализа на EY, над 114.000 работни места во германската индустрија се изгубени во рок од една година. Од нив, 51.500 или речиси половина се во автомобилскиот сектор, што е речиси 7% од работната сила во овој сектор. Ниту еден друг сектор не е погоден толку силно. Овој тренд отвора сериозни прашања за иднината на германскиот индустриски модел.
Изгубени 245 илјади работи места од пред Короната
Вкупниот број на вработени во индустријата во Германија на 30 јуни годинава изнесувал 5,42 милиони – 2,1% помалку од истиот период лани. Ова значи дека приближно 114.000 работни места се отпуштени во рок од една година, според студијата базирана на податоци од Федералниот завод за статистика Дестатис.
Од 2019 година, односно пред коронавирусот, бројот на вработени во индустријата се намалил уште повеќе, за околу 245.000, што е намалување од 4,3%.
Во исто време, индустриската продажба бележи пад од 2,1 % во вториот квартал, што е осми последователен пад. Сите сектори освен електронската индустрија забележаа пад, според EY. Во автомобилската индустрија, која се бори со слаба продажба, конкуренција од Кина и премин кон е-мобилност, продажбата се намали за 1,6%.
Царините и забавувањето на Кина
Германската индустрија се соочува со високи трошоци за енергија, бирократски пречки и слаба домашна побарувачка, но и со царинскиот спор со САД. Според EY, извозот во САД значително се намалил.
“Масовниот пад на извозот во САД неодамна силно ја погоди германската индустрија“, вели Јан Брорхилкер, управувачки партнер во EY.
Високите царини наметнати од Доналд Трамп ги прават германските производи поскапи во САД – иако ЕУ сака ретроактивно да ги намали своите царини за автомобили.
Дополнително, извозот во Кина опаѓа поради засилената конкуренција од кинеските производители, особено во автомобилскиот сектор.
Под притисок, производители како Mercedes-Benz и VW, како и добавувачите Bosch, Continental и ZF, најавија програми за намалување на трошоците. Porsche планира во голема мера да ја затвори својата подружница за батерии Cellforce.
„Масовниот пад на профитот, преголемиот капацитет и слабеењето на странските пазари ги прават неизбежните значителни намалувања на работни места – особено во Германија, каде што се наоѓаат менаџерските, административните и истражувачките функции и функциите за истражување и развој“, вели Brorhilker.
Намалување има и во други индустрии
Но, не е само автомобилската индустрија таа што намалува работни места. Според EY, добри 17.000 работни места биле изгубени во машинското инженерство во рок од една година, а 12.000 во производството на метали.
Спротивно на тоа, речиси и да немало работни места изгубени во хемиската и фармацевтската индустрија.
Кризата во индустрискиот сектор одамна предизвикува дебата за Германија како локација за бизнис. Критичарите зборуваат за деиндустријализација.
Ако се гледа на подолг рок, вработувањето во индустријата во Германија има раст. Според Федералниот завод за статистика, на крајот на 2024 година тоа било за 3,5% или 185.000 луѓе поголемо отколку во 2014 година.
Тежок период замладите инженери
Брорхилкер очекува трендот на намалување на работните места во индустријата да продолжи, бидејќи програмите за штедење се појавуваат во статистиката со задоцнување. Ова е лоша вест за дипломираните студенти.
„Автомобилската индустрија и машинското инженерство вработуваат значително помалку млади луѓе денес отколку во последните години. Пазарот на труд за млади инженери, на пример, станува сè потежок и многумина веројатно ќе мора да се преориентираат. Ќе видиме зголемување на невработеноста кај дипломираните студенти – нешто што не е видено во Германија долго време.“
Извор: Welt
Колку се силни последиците за македонската индустрија за авто делови и за македонскиот извоз прочитајте во анализата како работеле лани Топ 20 најголемите компании во оваа индустрија.
