Владата на Р.С Македонија на денешната видеоконференциска седница 68 седница, даде согласност на Договорот за доделување на државна помош склучен помеѓу Владата на Република Северна Македонија, застапувана и претставувана од Дирекцијата за технолошки индустриски развојни зони и „НЕКСТ.Е.ГО МОБИЛЕ“ (Next.e.GO Mobile SE).
Германската НЕКСТ.Е.ГО МОБИЛЕ СЕ од Ахен ќе инвестира околу 130 милиони евра во фабрика во технолошко-индустриската зона во Тетово во која ќе се произведуваат електричните возила e-go. Со новата инвестиција ќе се отворат 3-4.000 нови работни места, информираат од Владата.
Ова е за првпат во автомобилската индустрија кај нас да се продуцира целосен автомобил и се разбира за првпат ќе се произведуваат електрични автомобили.
Од Владата потенцираат дека придобивките од оваа инвестиција се многукратни – од отворање на нови работни места, извоз на производи со голема додадена вредност, пренос на знаење и технологии, мапирање на земјава кај странските инвеститори во оваа фела, до договори и дополнителна работа за локални компании.
Деталите за инвестицијата и државната помош се очекува Владата да ги соопшти во сабота на настан на кој се планира да бидат присутни и претставници на компанијата.
Инаку претседател на бордот на германската Next.e.GO Mobile од 2020 година е Али Везвеи, кој е истовремено е и извршен директор и дел од бордот на компанијата Еколог Интернационал од Тетово. (ECOLOG, кој моментално работи во повеќе од 35 земји, обезбедува решенија клуч на рака и приспособени услуги за владите, одбранбениот сектор, хуманитарни организации како и за комерцијални клиенти во секторите нафта и гас, рударство, енергија и инфраструктура).
Податоците од Централниот регистар покажуваат дека компанијата НЕКСТ.Е.ГО МОБИЛЕ е основана на 29 јули 2022 година со основачки капитал од 5.000 евра и со основна дејност производство на моторни возила. Како управител на компанијата е назначен германецот Фабиан Веисенборн.
Компанија Next.e.GO Mobile, која располага со технологија за масовно производство на евтини електрични автомобили, минатата година потпиша договор за изградба на фабрика во бугарскиот град Ловеч, во која ќе инвестира 140 милиони евра и ќе се отворат 1000 работни места.
Компанија Next.e.GO Mobile SE е основна во 2015 година од страна на RWTH Aachen и професорот Гинтер Шух.
Германскиот стартап за електрични возила Next.e.GO Mobile на почетокот на август годинава објави дека ќе излезе на Њујоршка берза, а проценетата вредност на компанијата е 913 милиони долари.
Инаку, германската компанија e.GO Mobile во април 2020 година прогласила банкрот, за да на 1 септември 2020 година дека целиот бизнис на компанијата го презема холанскиот фонд ND Industrial, на која како основач се јавува тетовчанецот Назиф Дестани, сопственик и на компанијата Ecolog од Тетово.
