Владата на Република Северна Македонија на денешната владина седница по предлог на Министерството за земјоделство, шумарство и водостопанство ги донесе новите две дополнителни мерки за финансиска поддршка на лозарите и винариите. Овие две мерки, кои Владата ги донесе, се резултат од констуктивната средба на претставниците на лозарите и винариите со премиерот Димитар Ковачевски и министерот Љупчо Николовски.
Преку измените на Програмата за финасиска поддршка во земјоделството за 2022 година се воведува нова мерка за предадено грозје во регистрирани капацитети за производство на вино во Република С.Македонија, со висина од 2 денари по килограм.
Корисници на оваа нова подмерка се земјоделски стопанства кои имаат површини под лозови насади и остварено производство на винско грозје од реколта 2022 година, кое е предадено во регистрирани капацитети за производство на вино, или е преработено за потребите на сопствениот преработувачки капацитет.
Од Министерството за земјоделие се задоволни дека успеале преку заеднички разговори со лозарите и винариите оваа година да постигнат историски најголемо зголемување на откупната цена за грозјето од 30%.
Грозјето од сортата Смедеревката оваа година ќе се откупува по просечна цена од 13 денари за килограм, а вранецот по 15 денари за килограм, што е за 3 денари повеќе споредено со ланските откупни цени.
Со дополнителните мерки на веќе договорените 13 и 15 денари за килограм ќе се додадат уште плус 2 денари, со што откупната цена на грозјето ќе достигне 15 денари за смедеревка и 17 за вранец.
“Ако на ова ги додадеме и субвенциите од 40.000 односно 48.000 денари по хектар, стигнуваме до плус 3 денари за килограм, што значи дека со сета наша поддршка и коректниот однос на винариите, лозарите добиваат вкупно 18 денари за килограм за смедеревка и 20 денари за килограм за вранец”, велат од Министерството за земјоделие.
Финасиска поддршка е обезбедена и за винариите преку новата мерка за поддршка на произведено и извесено вино за период од 01.09.2021 до 01.09.2022 година. Корисници на оваа нова мерка се регистрираните производители на вино запишани во Регистарот на производители кои во 2021-2022 година имаат произведено и извезено вино. Финасиската поддршка со оваа дополнителна мерка изнесува 2 денари по литар за наливно вино, 3 денари за стаклена амбалажа до 0.75 литри, 3 денари за bag in box и ПЕТ амбалажа со тежина од 2 до 10 литри и 4 денари за стаклена амбалажа и ПЕТ амбалажа со тежина од 0.75 до 2 литри.
Од Министерството за земјоделство, шумарство и водостопанство велат дека преку мерките за поддршка на лозарите од 2017 година до денес преку разни основи на поддршка се инвестирани од околу 76.5 милиони евра, од кои 74 милиони се средства директно исплатени кон лозарите.
“Сите овие вложувања и мерки кои министерството и Владата ги превзема во насока на поддршка на овој сектор дале резултати. Денес домашното производство на грозје го стабилизираме, со просечно годишно производство од околу 270 илјади тони, додека просечното годишно производство на вино е околу 100 милиони литри”, велат од Министерството.
Во Македонија има 139 винарски визби, кои располагаат со вкупен капацитет за преработка на вино до околу 200 милиони литри, што е речиси два пати поголем од годишното производство на вино.
Континуиран раст има и кај извозот на флаширано вино од скоро 69 милиони литри за 2021 година, што претставува пораст од 8,8% по количина споредено со 2020 година.