Фармацевтската индустрија е една од ретките индустрии во македонската економија кај кои пандемијата на корона вирус не предизвика пад во производството и извозот.
Иако оваа индустрија не беше поштедена од нарушувањата во транспортот и трговијата, статистичките податоци покажуваат дека успеала во првите четири месеци годинава да оствари поголеми продажби на странските пазари во споредба со истиот период лани.
Статистичките податоците на Државниот завод за статистика покажуваат дека во текот на првите четири месеци годинава е реализиран извоз на лекови, медицински и фармацевтски производи во вредност од 36,7 милиони евра, што е за 21,4 % повеќе во споредба со истиот период лани.
Најголем извоз имало во март од 12,7 милиони евра, но веќе следниот месец, во април, странската побарувачка се стабилизирала и извозот е намален на 8,2 милиони евра.
Но, оваа криза уште еднаш потенцираше дека и покрај домашното производство на лекови, како држава сме премногу зависни и од увоз на најразлични лекови.
Така во периодот од јануари до април годинава во земјава се увезени лекови во вредност од дури 83,2 милиони евра. Во споредба со истиот период лани увозот на лекови е зголемен за дури 47%
Увозот на лекови бил најголем во февруари, дури 25,8 милиони евра, кога корона вирусот уште не беше проширен во толкава мера низ земјава, но зголемениот увоз продолжува и во март и април.
Најголем производител и извозник на лекови произведени во Македонија е домашната компанијата Алкалоид, која уште на почетокот на кризата, кога се затворија границите успеа да направи брза реорганизација и да го зголеми производството на дезинфициенси за да ја задоволи зголемената побарувачката на домашниот пазар. Од компанијата тогаш уверија дека имаат доволно залихи на лекови, раствори за дијализа, инфузиони раствори и дезинфициенси за да се задоволат потребите на домашниот пазар.
Корона кризата потенцираше колку е важно да се има домашно производство на лекови
Но, податоците за големиот раст на увозот ја покажаа и преголемата зависност од увоз на лекови и фармацевтски производи.
Ова не е случај само за време на корона кризата, туку и низ годините наназад земјата е голем увозник на лекови.
Само минатата година Македонија увезла фармацевтски производи во вредност од 186 милиони евра, додека извозот изнесувал близу 94 милиони евра.
Пандемијата со корона кризата предизвика еден вид освестување и вклучување на црвениот аларм во многу земји во светот заради преголемата зависност од лекови и фармацевтски супстанци кои се произведуваат во странство.
Многу земји во светот, но и во регионот, меѓу кои Франција, Германија и САД, најавија низа промени во економските политики и државна поддршка, со цел зголемување на домашното производство на лекови и намалување на зависноста од увезени лекови од странство.
Германија отиде и чекор понатаму. Ги смени законите и забрани купување на компании кои произведуваат лекови, вакцини и заштитна медицинска опрема од странски фирми без претходна дозвола од државата и одлучи да ко-финансира во формирање на компании за производство на заштитни медицински маски и медицински средства кои ќе можат да се продаваат само на германскиот пазар.
