Францускиот претседател Емануел Макрон го претстави пакетот помош од 8 милијарди евра за автомобилската индустрија, што вклучува зголемени субвенции за набавки на електрични автомобили и ги охрабрува производителите да ги преселат своите фабрики назад во Франција.
Макрон најави и низа мерки насочени да и се помогне на француската индустрија да се опорави од појавата на коронавирус, што го сопре производството и стави во ризик 400.000 работни места во секторот.
„Ни треба мотивациска цел. Да ја направиме Франција најголем производител на чисти возила во Европа со тоа што ќе произведеме повеќе од еден милион електрични и хибридни автомобили годишно во текот на следните пет години“, изјави Макрон.
Преговорите со француските автомобилски компании „Ситроен“, „Пежо“ и „Рено“ траат со недели, а јасно е дека пакетот за поддршка од 8 милијарди евра нема да дојде без услови.
Макрон јасно стави до знаење дека се очекува да направат повеќе домашни автомобили, произведени во Франција.
„Државата ќе обезбеди повеќе од 8 милијарди евра помош за овој сектор. За возврат, производителите на автомобили се обврзаа да го преместат производството со додадена вредност во Франција и да го консолидираат и одржат целото индустриско производство во нашите фабрики“, изјави Макрон.
Големите три автомобилски компании освен во Франција имаат фабрики ширум светот, во Португалија, Словачка, Шпанија, Турција…
Тие веќе најавуваат дека поголемиот дел од производството на електрични мотори и други делови за електрични автомобили ќе го лоцираат во Франција за да ги исполнат условите за добивање на државната помош.
Дел од државната помош вредна 8 милијарди евра се и субвенциите за купување на нови електрични автомобили од страна на француските граѓани.
Со цел да се зголеми бројот на електричните возила, Франција исто така планира низ целата земја да инсталира 100.000 станици за полнење до 2021 година.
Колку за споредба Германија се обврза со 2030 година да инсталира 1 милион станици за полнење низ целата земја.
Извор: Euroaktive
