Ако пред една година најголем проблем во индустријата за бродски товарен транспорт беше како да се дојде до празен контејнер сега преовладува загриженоста за презаситеност, односно малата побарувачка за контејнери, бидејќи нивоата на товарите кои се превезуваат се враќаат на ниските нивоа од пред-Ковид-19.
Фотографиите од најпрометните пристаништа во Кина како Шангај и Јантиан (Шенжен) сега се преполни со празни контејнери.
Локалните медиуми, исто така, објавуваат дека нарачките за произведена стока за многу кинески мали и средни претпријатија и извозници се намалени, заради што се доведени до работ на банкрот.
Овој тренд беше особено потенциран со веста дека една виетнамска фабрика за чевли во сопственост на тајванската групација Поу Чен, мораше да укине 6.000 работни места по падот на нарачките од големите компании за спортска облека Nike и Adidas.
Според податоците објавени од Шангајската берза за испорака на 11 февруари, закрепнувањето на кинескиот извоз по кинеската Нова година не е задоволително.
Drewry’s World Container Index на 16 февруари објави дека просечната цена за испорака за контејнери од 40 стапки паднала за 81% од врвот од 10.377 американски долари во септември 2021 година, на 1.955 американски долари сега. Консултантската куќа неодамна процени дека прекумерната понуда на контејнери ќе достигне 6 милиони TEU, поради прекумерна нарачка за време на добрите времиња.
Аналитичарот на Linerlytica, Тан Хуа Џо, изјави за Container News дека натрупувањето празни контејнери во пристаништата е илустрација за слабиот пазар.
„Побарувачката за карго транспорт е многу слаба во моментот, особено во САД, додека метежот, особено во американските пристаништа, е намален. Сето тоа резултираше со вишок празни контејнери кои ги проценувам на 4 милиони TEU и ќе треба најмалку една година за состојбата да се нормализира.
