Фармацевтската компанија Алкалоид ги објави резултатите од работењето во изминатата 2021 година кои покажуваат продолжување на трендот на раст и позитивни финансиски резултати, зголемување на извозот на странски пазари, нови инвестиции и вработувања.
Oбјавените извештаи на компанијата на Македонската берза покажуваат дека најсупешната домашна компанија изминатата 2021 година, кога одбележа и 85 години постоење, ја завршила со консолидирани приходи од продажба од над 208 милиони евра, кои бележат раст од 5% во споредба со претходната 2020 година. Со тоа приходите од продажба на Алкалоид за прв пат во досегашното постоење надминаа над 200 милиони евра, што ја вбројуваат меѓу најголемите фармацевтски компании во Југоисточна Европа, со две подружници во земјава и 18 подружници во странство.
И покрај бројните предизвици кои ги предизвика заздравувањето од пандемијата на Ковид 19, Алкалоид минатата 2021 година успеа да ја заврши со раст на продажбите во странство од 6%, нови инвестиции од над 19 милиони евра, раст на профитабилноста од 12% и 214 нови вработувања.
Според неревидираниот консолидиран биланс на успех, во периодот јануари-декември 2021 година, вкупните консолидирани продажби на Алкалоид достигнуваат 12.794.180.346 денари или 208 милиони евра, што е за 5% повеќе во споредба со истиот период од 2020 година.
Според единечниот биланс на успех, во периодот јануари – декември 2021 година продажбите достигнуваат 9.559.754.748 денари (155,4 милиони евра), што е за 4 % повеќе во споредба со истиот период од минатата година.
“Алкалоид” лани отворил пет нови пазари за извоз во светот
Од вкупните консолидирани продажби, 65% или 136 милиони евра се остварени од извоз односно од продажба на странските пазари. Извозот лани бележи раст од 6%, додека продажбите на домашниот пазар се зголемени за 4%.
Гледано според региони, во земјите од Југоисточна Европа се остварени 32%, во земјите од Западна Европа (ЕУ и ЕФТА) се остварени 19%, во Русија и во другите земји од ЗНД се остварени 13%, а на другите пазари се остварени 1% од вкупните консолидирани продажби.
Најголем пораст кај извозните пазари бележат продажбите остварени во Германија (раст од 160 %), Полска (раст од 131 %), Украина (раст од 47 %), Русија (раст од 45 %), Унгарија (раст од 30 %), Бугарија (раст од 16 %), Чешка (раст од 12 %) итн.
Гледано според групи производи, во структурата на вкупните консолидирани продажби најголемо учество заземаат производите од сегментот фармација, и тоа 88 %. Од нив поголем удел имаат антибиотиците со удел од 21 %, препаратите ОТЦ со 20 %, кардиолошките препарати со 14 %, невролошките препарати заземаат 13 % од вкупните консолидирани продажби итн. Сегментот хемија, козметика и билкарство учествува со 12 % во вкупните консолидирани продажби, поточно хемијата учествува со 2 %, козметиката со 8 %, а билкарството учествува со 2 %.
За првпат во сегментот фармација се реализираа продажби на производи во Германија, Австрија, Португалија и на Кипар, а во сегментот козметика се реализираше првата поголема продажба на колекцијата Becutan во Саудиска Арабија.
Само во 2021 година инвестирани 1,2 милијарди денари и ангажирани 1.55 домашни добавувачи
Од компанијата информираат дека остварената консолидирана добивка пред финансиските трошоци, даноците и пред амортизацијата (ЕБИТДА) достигна 2.302.590.062 денари (37,4 милиони евра) и бележи раст од 11 %. Консолидираната нето-добивка, пак, минатата година изнесува 1.304.960 илјади денари или 21,2 милиони евра во споредба со остварената во 2020 година бележи зголемување за 12%.
Вкупните инвестиции кои компанијата Алкалоид ги направила во основни средства во 2021 година изнесуваат 1.186.125 илјади денари или над 19,3 милиони евра. Посветени на растот и развојот , како и на најновите трендови во фармацијата, “Алкалоид” во изминатите две децении инвестираше над 200 милиони евра. Трендот на инвестиции ќе продолжи и во 2022 година, кога компанијата планира околу 14 % од консолидираните приходи од продажби да ги инвестира во материјални и во нематеријални средства.
При извршувањето на активностите во текот на 2021 година, компанијата Алкалоид ангажирала 1.055 домашни добавувачи, што е уште еден показател за придонесот кон домашната економија.
Во 2021 година нови 214 вработувања во Алкалоид
Во периодот јануари – декември 2021 година во Алкалоид се реализирани 214 нови вработувања. Со одлука на Управниот одбор на компанијата во март 2021 година е одобрен и исплатен регрес за користење годишен одмор за вработените во компанијата, во висина од 100 % од просечната исплатена нето-плата од работник во претходните три месеци во Р.С. Македонија. Исплатениот надомест од вработен е во износ од 31.167 денари бруто, односно 28.050 денари нето. Во декември 2021 Управниот одбор по повод Јубилејот 85 години Алкалоид, одобри исплата на награда за вработените во нето износ од 28.000 денари.
Групацијата Алкалоид брои 2.528 вработени, од кои 1.942 се во базата во Скопје, а 586 се вработени во подружниците во странство.
Акциите на Алкалоид во 2021 година вределе за околу 30% повеќе отколку во 2020
Акциите на АлкалоидСкопје котираат на официјалниот пазар на Македонска берза за хартии од вредност од 2002 година и важат за едни од најтргуваните и најликвидните акции на берзата. Цената на акцијата во периодот јануари – декември 2021 година се движеше од 13.300,00 денари до 18.501,00 денари, или просечно 15.799,55 денари за една акција, што претставува раст од 29,8 % во споредба со просечната цена во истиот период од 2020 година.
На 31.12.2021 година акциите на Алкалоид беа во сопственост на 5.170 акционери, физички и правни лица, a пазарната капитализација на компанијата изнесуваше 26,4 милијарди денари.
Бизнис планот за 2022: Раст на продажбите и профитот
Бизнис-планот за 2022 година, донесен со одлука на Управниот одбор на Алкалоид на седницата одржана на 29.12.2021 година, предвидува инвестирање на околу 14 % од консолидираните приходи од продажбите во материјални и во нематеријални средства, раст од 8 % на консолидираните продажби во однос на 2021 година, како и раст од 7 % на консолидираниот профит пред оданочувањето во однос на 2021 година.
Бизнис-планот за 2022 година е базиран на очекувањата, проекциите и на можностите на тековните и на новите пазари и производи, достапни за компанијата во моментот на изготвување на планот. Околностите и настаните во 2022 година, а со тоа и остварените резултати, може да варираат во однос на прикажаните во бизнис-планот.
Какви се очекувањата за 2022?
Во изминатиот период друштвото се соочи со голем број интерни и екстерни предизвици и новонастанати ризици, генерирани од пандемијата на КОВИД-19. Презедовме голем број мерки во досегашниот период, со цел неутрализирање на сите негативни ефекти, без притоа да се загрози здравјето на вработените и успешното работење на друштвото.
Во согласност со очекувањата, во текот на 2021 година здравствената криза се претвори и во економска а со тоа се појавија и нови предизвици во работењето. Она што како тренд веќе започна уште во 2021 година, а ќе доминира во 2022 година е забележителниот раст на цените на голем дел од влезните суровини и материјали, енергенсите, како и порастот на цените на транспортот на глобално ниво, а особено и значителните пролонгирања на роковите за испорака. Сето ова веќе започна да влијае и на стапката на инфлацијата што веројатно како тренд ќе биде уште понагласен во 2022 година. Земајќи го предвид конфликтот помеѓу Русија и Украина, започувајќи од 24 февруари 2022 година, Алкалоид превзема неопходни мерки за заштита на инвеститорите, купувачите и вработените обезбедувајќи им сигурни услови.
Како најголем предизвик и прв приоритет за периодот што доаѓа и понатаму останува грижата за здравјето на вработените, како и одржувањето на тековната ликвидност, на финансиската стабилност и остварување на планските цели.
