Во првите девет месеци годинава македонските производители на прехранберни и земјоделски производи на странските пазари продале производи во вредност од околу 330 милиони евра. Тоа е зголемување од 15,5% во споредба со истиот период лани.
Во истиот период, пак, увозот на прехранбени производи во земјава е зголемен за 21,9%, надминувајќи 642 милиони евра.
Ако се погледнат извезените количини на странските пазари во периодот јануари-септември 2022 година, тие се на речиси исто ниво како и лани, односно се поголеми за само 0,38%, што значли дека зголемените извози приходи се должат пред се на инфлацијата, односно на зголемените цени на храната.
Дефицитот во трговијата со храна на македонија со светот во периодот јануари-септември годинава надмина 313 милиони евра, што е зголемување за 29,5% или за над 71 милиони евра во споредба со истиот период лани.
Најголемиот дел од извозот на храна реализиран во првите девет месеци годинава или 46% отпаѓа на извозот на зеленчук, овошје и преработки, чија вредност надмина 152 милиони евра, што е раст од 14% во споредба со истиот период лани.
Втора најзначајна ставка во извозот на храна е извозот на жита и преработки од жита, чија вредност е зголемена за 15,6%, на 70 милиони евра во периодот јануари-септември 2022 година. Најголемиот дел од оваа ставка отпаѓа на извозот на кондититорски производи.
Вредноста на извозот на месо и преработки од месо во првите девет месеци достигна 28,4 милиони евра и бележи раст од 3,4% во споредба со истиот период лани.
