Јапонската групација Nippon Express Holdings (Nx Group) објави дека и официјално го заврши процесот на преземање на австриската логистичка компанија cargo-partner. Овој значаен настан беше објавен на посебно организиран настан за клиентите и партнерите кој се одржа на 8 јануари во Виена . Посебната конференција за новинари на која менаџментот на двете компании дискутираше за стратешката визија на новата компанија ја проследи и порталот ИзвозМК, како единствен медиум од Македонија.
На настанот беше објавено дека Nippon Express Holdings (Nx Group) ги преземала сите акции на cargo-partner и неговите подружници низ Централна и Источна Европа.
Cargo-partner работи на македонскиот пазар од 2021 година, како надополнување на центрите за логистика и патен транспрт во Бугарија, Грција, Србија, Хрватска и Словенија.
Австриската Cargo-partner е високо реномирана корпоративна групација фокусирана главно на воздушни и океански шпедиции во Европа, Азија и Северна Америка, која исто така нуди железнички и камионски транспорт и договорни логистички услуги.
Нејзиниот основач и досегашен сопственик Стефан Краутер во своето излагање се осврна на досегашното четири децениско работење на оваа семјна фима, истакнувајќи го како посебен успех фактот што досегашниот раст и развој на cargo-partner e резултат на органски раст, а не на аквизиции.
Краутер се заблагодари за поддршката и довербата на сите клиенти, партнери и целата cargo-partner заедница.
“Уверен сум дека одлуката патувањето да се продолжи заедно со Nippon Express групацијата ќе донесе уште поголеми достигнувања”, изјави Краутер.
Силната логистичка и деловна база која cargo-partner ја има во Централна и Источна Европа, ќе ја надополни логистичката инфраструктура на NX Group во овој дел на светот, како последица на што се очекува да забележи значителен иден раст како производствена база во европскиот регион.
“Со купувањето на cargo-partner, NX Group ќе ја комплетира својата логистичка инфраструктура во регионoт на Централна и Источна Европа, за кој се очекува да постигне значителен раст како производствена база во иднина. Исто така, овој чекор ќе ни овозможи дополнително да ја прошириме нашата глобална мрежа, како и да ги подобриме услугите што ги обезбедуваме во Европа“, изјавија од менаџментот на Nippon Express.
Зголемувањето на обемот на воздушниот и океанскиот товар ќе и даде конкурентска предност на групацијата Nippon Express на глобалниот пазар. Тоа ќе и овозможи на групацијата да ги исполни различните барања на своите глобални клиенти, да ги подобри своите логистички способности меѓу Азија и Европа и да го прошири портфолиото на глобални клиенти, покрај постојните бројни јапонски клиенти.
Бидејќи групата NX и cargo-partner имаат различни бази на клиенти и различни сили во одредени земји и региони, тие ќе се обидат да создадат синергија во нивните логистички операции преку меѓусебно надополнување, а со тоа да го забрзаат проширувањето и развојот на нивните глобални бизниси.
Мицуро Саито, претседател на NX групацијата истакна дека брендот cargo-partner ќе продолжи и понатаму и кон него ќе се однесуваат со највисоко почитување и дека оваа аквизиција ќе им помогне во целта да станат една од петте водечки глобални логистички компании.
По Договорот за преземање, новата компанија ќе биде една од петте најголеми авио шпедитери со волумен од повеќе од 1 милион тони. Во 2022 година, Nippon Express беше шестата најпрометна компанија за авиопревоз со околу 867.039 тони, додека cargo-partner со 218.607 тони превезен товар била на 24 место.
Nippon Express е јапонска групација со седиште во Токио, со силна глобална мрежа на 718 локации во 50 земји и со над 73 илјади вработени.
Компанијата нуди авионски превоз, поморски транспорт, тежок транспорт, складирање и дистрибуција, услуги за информатичка технологија…
Фото: cargo-partner
