Примената на агентската вештачка интелигенција во компаниите, зголемувањето на продуктивноста и трансформацијата на деловните модели се во фокусот на 21. годишна конференција на МАСИТ, која денеска, 18 ноември, се одржува во Скопје. На конференцијата учествуваат претставници на светските технолошки компании „Нвидиа“ и „Леново“, експерт од екосистемот на „ОпенАИ“, како и претставници на домашниот ИКТ сектор, бизнис-заедницата и државните институции.

Под мотото „Agentic AI – Turning AI into Real Business Value“, конференцијата отвора повеќе дискусии за тоа како вештачката интелигенција да се претвори во конкретна деловна вредност, кои се можностите за нејзина практична примена во компаниите и како новите технологии можат да придонесат за развојот на бизнисот, економијата и јавниот сектор.

Со воведните обраќања на овогодинешната конференција на МАСИТ беше истакната важноста на технолошките промени што веќе влијаат врз глобалната економија и начинот на работење на компаниите.


Особено внимание беше посветено на потребата од развој на нови знаења и вештини, подготвеноста на домашните компании за примена на современи технологии и можностите Македонија да ја зајакне својата позиција во меѓународната дигитална економија.

Од МАСИТ посочуваат дека целта на конференцијата е да се поврзат домашните компании и институции со меѓународните технолошки експерти, да се поттикне размената на знаења и искуства и да се охрабри пошироката примена на вештачката интелигенција како алатка за зголемување на продуктивноста, конкурентноста и економскиот раст.

Експерти од „Нвидиа“, „Леново“ и екосистемот на „ОпенАИ“ меѓу главните говорници

Меѓу главните говорници на конференцијата е Патриција Сокалска-Помахо, директорка за развој на бизнисот за Централна и Источна Европа во „Нвидиа“, компанија која има водечка улога во развојот на технолошката инфраструктура за вештачка интелигенција.

На конференцијата ќе се обрати и Маријан Кориенек, директор за корпоративен бизнис за Централна и Источна Европа и Централна Азија во „Леново“, како и Берат Ќамили, амбасадор на Codex во „ОпенАИ“, кој ќе говори за развојот и пошироката примена на агентската вештачка интелигенција.

Учеството на меѓународните експерти е можност домашната бизнис-заедница да се запознае со актуелните технолошки достигнувања, новите решенија базирани на вештачка интелигенција и нивниот потенцијал за практична примена во деловното работење.

Посебна дискусија во рамките на конференцијата е посветена на Националната фабрика за вештачка интелигенција и нејзиното значење за развојот на домашните компании и технолошкиот екосистем.

На панелот е најавено учество на министерот за дигитална трансформација, Стефан Андоновски, и деканот на Факултетот за информатички науки и компјутерско инженерство (ФИНКИ), Петре Ламески.

Во фокусот на дискусијата ќе бидат можностите што ги отвора развојот на националната инфраструктура за вештачка интелигенција, како и нејзината улога во поттикнувањето на иновациите, дигиталната трансформација и примената на напредни технолошки решенија во компаниите.

Примената на AI во здравството, транспортот и корпоративното работење

Еден од централните панели на конференцијата, насловен „Следната генерација на бизнисот: човекот, технологијата и новата ера на AI“, ќе биде посветен на промените што ги носи вештачката интелигенција во различни сектори, со посебен акцент на здравството, транспортот и корпоративното работење.

На панелот ќе учествуваат кардиоваскуларниот хирург д-р Жан Митрев, Дарко Пејчинов од „ИнВита Хелткер Технолоџис Балкан“, Неџат Курт, генерален директор на ТАВ Македонија, и Живко Тофиловски, потпретседател за инженерство во „РЛДатикс“.

Дискусијата ќе се фокусира на практичните аспекти од примената на вештачката интелигенција, нејзиното влијание врз деловните процеси и можностите за подобрување на ефикасноста, услугите и начинот на управување во различни индустрии.

Посебен панел, насловен „Од еден клик до милион можности: Новата ера на интелигентни услуги“, ќе биде посветен на развојот и примената на интелигентните услуги, со учество на претставници од КИБС, КаСис и А1 Македонија.

Во рамките на овој панел ќе се разгледуваат можностите што ги отвораат новите технологии за унапредување на дигиталните услуги, автоматизација на процесите и создавање нови решенија приспособени на потребите на корисниците и компаниите.

Останатите експертски дискусии ќе бидат насочени кон новите бизнис-модели, дигиталната трансформација и организациските промени што ги носи вештачката интелигенција, како и кон предизвиците со кои се соочуваат компаниите при нејзиното воведување во секојдневното работење.

Клиники за вештачка интелигенција и практична работилница за лидерство

Во рамките на конференцијата е предвидено и официјално отворање на клиники за вештачка интелигенција, како дополнителна иницијатива насочена кон поттикнување на практичната примена на AI технологиите.

Програмата вклучува и практична работилница посветена на влијанието на технолошките промени врз лидерството и управувањето со компаниите, со акцент на приспособувањето на менаџерските пристапи кон новите услови на работење.

Со овогодишното издание, годишната конференција на МАСИТ го става акцентот на преминот од теоретските можности на вештачката интелигенција кон нејзина конкретна примена во деловните процеси, отворајќи прашања за тоа како компаниите можат да ги искористат новите технологии за подобрување на продуктивноста, развој на иновативни услуги и зајакнување на конкурентноста.