Пазарот на нови автомобили во Европската Унија продолжи да расте во мај, пред сѐ благодарение на силната побарувачка за електрични и хибридни возила. Според податоците на Европската асоцијација на производители на автомобили (ACEA), регистрациите на нови патнички автомобили се зголемиле за 3,2% на годишно ниво, достигнувајќи 955.013 возила.
Продажбата на автомобили со мотори со внатрешно согорување продолжи да опаѓа. Регистрациите на бензински автомобили се намалија за околу 20%, на 210.383 единици, додека дизел возилата паднаа на 69.482 единици. Наспроти тоа, продажбата на целосно електрични автомобили забележа силен раст од 43%, достигнувајќи 203.417 возила. Значително зголемување е регистрирано и кај хибридните модели.
На најголемите пазари во ЕУ, продажбата на нови автомобили во Германија пораснала за 0,1%, во Франција за 3,7%, а во Италија за 7,6%. Единствено Шпанија забележала пад од 0,8% во споредба со истиот месец лани.
Меѓу производителите, Volkswagen останува најголем автомобилски бренд во Европската Унија со 254.011 регистрирани возила во мај, иако продажбата му е намалена за 3,6%. Stellantis забележа пад од 2,6%, Renault од 1,3%, додека Dacia регистрираше намалување од 2,2%, на 45.211 возила.
Во периодот јануари–мај, регистрациите на нови автомобили во ЕУ се зголемиле за 4% и достигнале околу 4,75 милиони возила. Во истиот период, пазарниот удел на целосно електричните автомобили пораснал од 15,3% на 20%, што дополнително ја потврдува забрзаната транзиција кон електрична мобилност.
Силен пробив на кинеските производители
Податоците на ACEA покажуваат и силен пробив на кинеските производители на европскиот пазар. Leapmotor забележал раст на регистрациите од 447,3% во мај, Chery од 239,6%, а BYD од 158,8%. Во првите пет месеци од годината, Geely достигна пазарен удел од 2,6%, додека SAIC Motor и BYD имаат по 2,1%.
Американскиот производител Tesla покажува знаци на закрепнување по послабите резултати во 2025 година, со пазарен удел од 1,9% во првите пет месеци од годинава.
ПОВРЗАНИ ОБЈАВИ:
Кинеската извозна машина не запира: Извозот во мај порасна за речиси 20%
Кинеските производители на автомобили двојно го зголемија пазарниот удел во ЕУ
Извозот на електрични возила од Кина експлодира – раст од над 111% во април
