Здруженијата на превозници од Западен Балкан на вчерашниот состанок во Скопје одлучија да почекаат со евентуални протести до 1 септември, за кога е закажан состанок со претставници на Европската комисија во Брисел.
На состанокот на транспортерите од регионот, присуствуваа претставници на здруженија од Северна Македонија, Србија, Црна Гора и Босна и Херцеговина, кои на прес-конференцијата изјавија дека не сакаат да протестираат, но дека, доколку бидат принудени, ќе го преземат тој чекор.
Тие предупредија дека доколку повторно се организираат забраните, нема да престанат како претходниот пат, туку ќе продолжат сè додека не се исполнат нивните барања за професионалните возачи од Западен Балкан да можат да останат во Шенген зоната без проблеми.
„Одлуките за протести се формално донесени во нашите земји и на ниво на управни одбори, но како превозници не сакаме да протестираме бидејќи тоа се одразува на целото општество, но ако бидеме принудени, ќе мора да си заминеме. Искрено се надеваме и посакуваме тоа да не се случи“, рече претседателот на Меѓународното здружение за транспортен бизнис од Белград, Неѓо Мандиќ.
Тој истакна дека транспортните здруженија се согласуваат дека ЕУ не го менува договорот за престој во Шенген зоната, но бараат строго да се почитува правилото за 90 дена престој во претходните 180 дена, односно секоја минута да биде минута, секој час да биде час.
„А тоа значи, ако се каже дека граѓаните на трети земји имаат право да останат 90 дена во последните 180 дена, тогаш треба да се држиме до тоа правило, но бидејќи знаеме дека денот не е минута или час, некаде денот трае 24 часа, тоа значи дека ги бараме нашите 90 полни дена. И ако Европската комисија прифати да ни ги брои деновите изразени во часови, минути, па дури и секунди, тогаш проблемот е решен или барем привремено решен“, рече Мандиќ.
Тој изјави дека веќе се соочуваат со проблем, имено дека 50 проценти од возачите одбиваат да возат затоа што не се сигурни што ќе се случи на границата и дека сè зависи од волјата на вработените на граничните премини кои ја толкуваат одлуката 90/180 поинаку.
Генералниот секретар на Здружението на работодавачи на транспортни компании на Македонија, Макамтранс, Билјана Муратовска, рече дека поради системот за гранична контрола EES, транспортерите од Западен Балакно „буквално се без работа“, но дека ќе бидат трпеливи и ќе се обидат да создадат модели на движење за возачите до септември.
„Сега е сезона на празници, но она што следи од септември па натаму ќе биде многу трагично ако не најдеме решение. Не сакаме никому да му наштетиме, ниту на Европската Унија, ниту на нашите земји, а најмалку на себеси, на превозниците, но ако сме принудени, ќе организираме протести за да ги потсетиме сите уште еднаш дека сè уште постои проблем што треба да се реши“, рече Муратовска.
Според неа, како што објави агенцијата МИА, околу 17.000 професионални возачи во Северна Македонија се соочуваат со овој проблем, а има 100.000 од нив на Западен Балкан.
ПОВРЗАНИ ОБЈАВИ:
Превозниците од регионот и дадоа рок на ЕУ до 10 август да понуди решение за професионалните возачи
Превозниците од регионот денес на состанок со ЕК за решението за останување во Шенген зоната
Новиот систем за влез во ЕУ — закана за македонските камионски превозници, но и товар за извозниците
