Европската унија планира да ја забрани руската сурова нафта во следните шест месеци и рафинираните горива до крајот на годината како дел од шестата рунда санкции за да го зголеми притисокот врз Владимир Путин поради неговата инвазија на Украина.
„Ова ќе биде целосна забрана за увоз на целата руска нафта, преку море и нафтоводи, сурова и рафинирана“, рече претседателката на Европската комисија Урсула фон дер Лајен во предлогот до Европскиот парламент.
„Ќе се погрижиме постепено да ја исфрлиме руската нафта на начин што ни овозможува нам и на нашите партнери да обезбедиме алтернативни патишта за снабдување и да го минимизираме влијанието врз глобалните пазари“, изјави фон дер Лајен.
Покрај етапното ембарго за руската нафта, Европската комисија предложи и санкции за најголемата банка и забрана на руските радиодифузери на европскиот простор.
„Путин мора да плати цена, висока цена, за неговата брутална агресија“, изјави претседателката на Европската комисија Урсула фон дер Лајен пред Европскиот парламент во Стразбур.
„Денес ќе предложиме да се забрани целата руска нафта од Европа“, рече таа со аплауз во салата.
На Унгарија и Словачка, кои во голема мера зависат од руската енергија и се спротивставија на наглиот прекин на увозот на нафтата, ќе им се даде подолг временски рок – до крајот на 2023 година – за да ги спроведат санкциите, според луѓе запознаени со ова прашање.
Планот, доколку биде договорен од владите на ЕУ, ќе биде пресврт за најголемиот трговски блок во светот, кој зависи од руската енергија и мора да најде алтернативни залихи.
Европската унија добива околу 40% од својот природен гас од руските гасоводи и околу една четвртина од тоа тече низ Украина. Германија добива приближно половина од својот природен гас од Русија.
