Фабриката за заварени цевки и профили ФЗЦ 11 Октомври А.Д. од Куманово, чии производи во 99% се наменети за извоз веќе два месеци не работи. Поради високите сметки за струја и гас, оваа фабрика го прекина производството, а 70% од вработените се на принуден одмор со 70% плата.
На работниот состанок со Кризниот штаб, од страна на менаџерскиот тим на фабриката беше посочено дека во овој период ги поставуваат машините коишто претходно ги набавиле со цел подобрување на производствениот процес. Но, постои голема несигурност кога ќе го вратат производството.
Од државата очекуваат поддршка во вид на кредити со пониски стапки на камата, за да можат да постават фотоволтаични панели, како и промена на тунелската печка на гас со индукциска плоча, што би ги чинело 4,5 милиони евра.
„Не работиме, а сметките за струја се како кога работевме со полн капацитет. Во нашето производство големо влијание има и цената на гасот, така што постои голема неизвесност и околу тоа. Очигледно е дека агонијата со гасот ќе потрае. Веќе треба да ги направиме енергетските биланси за следната година, а не можеме ништо да предвидиме“, вели Јованче Јошев, советник на извршниот директор на фабриката.
Од страна на директорката Марија Ивановска, беше посочен и проблемот со регулативата околу локацијата за поставување на фотоволтаичните панели, како и проблемот со кадарот во фабриката.
„И нас вработените не прашуваат што е планот. Гледаат дека немаме работа и си заминуваат, најмногу во фабриките во слободните зони“, информираше Ивановска.
Менаџментот на ФЗЦ 11 Октомври А.Д. од Куманово побара државата, во овие тешки услови за работа, да има поголемо разбирање и поддршка за домашните компании.
