Американскиот производител на електрични автомобили Tesla ќе изгради нова мега-фабрика во Шангај за производство на уреди за складирање енергија Megapack, објавија кинеските медиуми во неделата.
„Новата фабрика треба да започне во третиот квартал од годината и да започне со производство во вториот квартал на 2024 година“, објави кинеската државна новинска агенција Xinhua, цитирајќи ја Тесла од церемонијата на потпишување на проектот во Шангај, каде што Tesla поседува и фабрика за автомобили.
Според извештајот, новата фабрика првично ќе произведува 10.000 единици Megapack секоја година, што е еднакво на околу 40 GWh складирање на енергија, а производите ќе се продаваат во целиот свет.
Tesla веќе има „мега фабрика“ во американската сојузна држава Калифорнија со капацитет да произведува 10.000 парчиња Megapack годишно.
Tesla Megapack е стационарен уред за складирање енергија од големи размери, наменет за употреба во електричната мрежа. Литиум-јонските батерии на Tesla Megapack се дизајнирани да ги стабилизираат енергетските мрежи и да спречат прекини на струја, што се наметнува како голем проблем со зголеменото производство на енергија од обовлива енергија.
Кина во моментов е најголемиот светски производител на батерии, што ја прави стратешки избор за Tesla да го зголеми производството и да ги намали произодствените трошоци за своите Megapack батерии.
Фабриката во Шангај ќе и овозможи на Tesla да ги искористи предностите од овој светски водечки синџир на снабдување со батерии, кој е од суштинско значење за задоволување на растечката глобална побарувачка за складирање енергија додека земјите преминуваат кон обновливи извори на енергија.
Минатата година, извештаите велеа дека Тесла планира да ја прошири една од своите најпродуктивни погони за производство на автомобили, Гигафабриката Шангај, во обид да додаде годишен капацитет од 450.000 единици.
