Владите на Европската унија (ЕУ) треба да се подготват за продолжено нарушување на енергетските пазари како резултат на војната со Иран, им порача шефот за енергетика на блокот на министрите пред вонредниот состанок кој се одржува денеска.
Во писмо до министрите за енергетика, датирано од 30 март, според Ројтерс,, комесарот за енергија на ЕУ, Дан Јоргенсен, вели дека владите се „охрабрени да направат навремени подготовки во очекување на потенцијално продолжено нарушување“.
Големата зависност на Европа од увезено гориво ја остава изложена на влијанието на конфликтот на Блискиот Исток врз глобалните цени на енергијата.
Цените на европскиот гас се зголемија за повеќе од 70% откако започна војната меѓу САД и Израел со Иран на 28 февруари.
Залихите на сурова нафта и природен гас на блокот не се директно погодени од затворањето на Ормутскиот теснец, бидејќи Европа увезува поголем дел од тие извори на енергија од добавувачи надвор од Блискиот Исток.
Јоргенсен рече дека Брисел е особено загрижен на краток рок за снабдувањето на Европа со рафинирани нафтени производи, како што се гориво за авиони и дизел.
Авионско гориво е најизложено
Аналитичарите велат дека авионското гориво во моментов е најизложениот европски енергетски производ на последиците од војната во Иран.
Последните пратки керозин што поминаа низ Ормутскиот теснец пред неговото затворање треба да пристигнат во Европа околу 10 април, според Бенедикт Џорџ, раководител на европски производи во Argus Media.
„Нема реален ризик од снемување“ на авионско гориво, изјави Џорџ за Ројтерс, бидејќи залихите на европските земји можат да покријат до три месеци побарувачка за керозин.
Сепак, „залихите би можеле да паднат на ниво каде што има локализиран недостиг“ или високи и нестабилни цени, објаснува тој.
ЕУ набавува околу 15% од својот керозин од добавувачи од Блискиот Исток, иако нејзината зависност е поголема отколку што сугерира оваа бројка, бидејќи блокот увезува и од рафинерии во Индија кои преработуваат нафта од Блискиот Исток.
Европа би можела да се сврти кон алтернативни добавувачи, вклучувајќи ги САД, за да замени дел, но не и целото снабдување, рече Џорџ.
Јоргенсен во своето писмо препорачува владите да избегнуваат мерки што би ја ограничиле трговијата со нафтени производи или би го обесхрабриле производството во европските рафинерии.
„Земјите-членки се охрабруваат да го одложат секое неитно одржување на рафинериите“, рече тој.
Министрите за енергија на ЕУ се очекува денеска да одржат состанок за да го координираат својот одговор на прекинот предизвикан од војната во Иран.
ПОВРЗАНИ НАПИСИ:
Војната во Иран ги загрозува производството и транспортот на вештачки ѓубрива
Не е само нафтата: Војната во Иран наруши многу глобални синџири на снабдување
