Глобалната трговија покажува знаци на закрепнување по рекордниот пад во вториот квартал, поврзан со пандемијата на коронавирус, објави Светската трговска организација (СТО) .
Индексот на глобална трговија во јуни падна на 18,6 поени во однос на истиот период лани и изнесуваше 84,5 поени. Ова е најниско ниво на индексот откако СТО започна да објавува извештаи во 2007 година, во време на финансиската криза.
Вредноста е во согласност со јунската проценка на СТО за пад на глобалната трговија од 18,5% во второто тримесечје од истиот период минатата година, се вели во Извештајот.
Точниот степен на падот на трговијата во вториот квартал ќе биде познат откако ќе бидат достапни официјалните податоци.
Во април, СТО предвиде дека глобалната трговија ќе падне меѓу 13 и 32 % оваа година, а ќе се искачи за 21% до 24% во 2021 година.
Во јуни, тие објавија дека ова песимистичко сценарио е малку веројатно, благодарение на брзиот одговор на владите на пандемијата.
„Статистиката за јуни на СТО упатуваше на 14% пад на глобалната трговија помеѓу првиот и вториот квартал од оваа година. Оваа проценка, заедно со новата вредност на стоковниот трговски барометар, укажува на тоа дека светската трговија во 2020 година се развива во согласност со помалку песимистичките сценарија прикажани од СТО во својата априлска прогноза“, објаснуваат од СТО.
Во нормални околности, барометарот предвидува промени во трговските трендови неколку месеци однапред, но силните осцилации предизвикани од пандемијата на коронавирус ја намалија неговата предвидлива вредност, предупредува СТО.
Сепак, тие укажуваат на знаци на закрепнување во третиот квартал.
Оттука, Извештајот покажува зголемување на индексот на нарачки за извоз во јуни, на 88,4 поени, од 83,3 поени во март.„Дополнителните показатели укажуваат на делумно мало зајакнување на светската трговија и производството во третиот квартал, но силата на таквото можно закрепнување останува многу неизвесна“, соопшти СТО.
Според податоците на СТО, се поверојатно е дека закрепнувањето нема да биде во форма на буквата V, туку буквата L, однсно по големиот пад, ќе следи подолг период на враќање на преткризните нивоа.
