Ситуацијата во германската автомобилска индустрија се влошува – има најмалку работни места од 2005 година
Германската индустрија продолжува да ги намалува работните места, а автомобилскиот сектор е меѓу најтешко погодените. Во првата половина од 2026 година, бројот на вработени во германскиот производствен сектор се намалил за 144.100, односно за 2,7% на годишно ниво.
Според податоците на Федералниот завод за статистика, на крајот на јуни во производствениот сектор биле вработени 5,29 милиони луѓе.
Особено голем пад е забележан во автомобилската индустрија. Во секторот имало 42.300 вработени помалку во однос на истиот период лани, што претставува намалување од 5,8%. Тоа е најголемиот пад меѓу големите индустриски сектори со најмалку 200.000 вработени.
Со вкупно 691.500 вработени, автомобилската индустрија достигна најниско ниво на вработеност од 2005 година. И покрај падот, таа и натаму е вториот најголем индустриски сектор во Германија според бројот на вработени.
На прво место е машинската индустрија со 905.900 вработени, иако и таа забележала пад од 2,7% во однос на претходната година. Намалување на бројот на вработени е регистрирано и кај производителите на метал (-3,8%), во хемиската индустрија (-3,6%) и кај производителите на електрична опрема (-3,4%).
Во автомобилскиот сектор, бројот на вработени го намалиле и производителите на автомобили и добавувачите на делови и опрема. Исклучок се производителите на каросерии, надградби и приколки, каде што е забележан раст на вработеноста.
Пад на извозот во Кина и САД
Германската индустрија, која во голема мера зависи од извозот, се соочува со притисок и од најважните странски пазари.
Во САД се воведени повисоки увозни царини, што дополнително ја ограничува побарувачката за германските производи. Во меѓувреме, Кина сè повеќе произведува стоки што претходно ги увезуваше од Германија, вклучително и автомобили и машини.
Како резултат на тоа, германскиот извоз во Кина во првите шест месеци од 2026 година паднал за повеќе од 12%, на нешто помалку од 37 милијарди евра.
Извозот во САД се намалил за околу 6%, на нешто повеќе од 74 милијарди евра.
ПОВРЗАНИ ОБЈАВИ:
Кина го уништува последното упориште на германската индустрија
Кризата во германската автоиндустрија се продлабочува – под удар и добавувачите
