Протекционистичките политики на претстојната американска администрација ќе го попречат глобалниот раст и Европа мора да биде подобро подготвена отколку во 2018 година, предупредуваат креаторите на политиката на Европската централна банка (ЕЦБ).
Новоизбраниот претседател на САД, Доналд Трамп вети големо зголемување на трговските бариери, вклучително и 10% универзална царина за увоз од сите странски земји и 60% царина за увоз од Кина, со цел да се намали трговскиот дефицит на САД.
„Она што го знаеме е дека значителните увозни давачки за кои се зборува може да имаат штетни последици за светската економија“, рече во Лондон шефот на финската централна банка Оли Рен. „Новата трговска војна е последното нешто што ни треба во услови на денешните геополитички ривалства – особено меѓу сојузниците“.
Шефот на австриската централна банка Роберт Холцман предупреди дека овие политики, доколку се спроведат, ќе ги задржат каматните стапки и инфлацијата во САД повисоки, што исто така ќе врши нагорен притисок врз цените на други места.
„Тој го мисли она што го кажа и веројатно ќе го спроведе побрзо отколку што очекуваме. Ако е така, што очекуваат пазарите?… Дека каматните стапки ќе останат повисоки и дека инфлацијата исто така ќе биде повисока“, рече Холцман, додавајќи тоа би извршило нагорен притисок врз инфлацијата на доларот и еврозоната.
Холцман тврдеше дека ако доларот се зацврсти и се приближи до паритетот во однос на еврото, тоа ќе има мерливо влијание врз увозните трошоци, особено за енергијата, што ќе ѝ отежне на ЕЦБ да стигне до целта за инфлација од 2% и потенцијално ќе го одложи процесот.
Трговските тензии почнаа да се зголемуваат меѓу САД и Европа за време на првото претседателство на Трамп и Европа се бореше да најде заеднички одговор, грешка што овојпат не треба да ја направи, рече Рен.
„Ако започне трговска војна, Европа не смее да биде неподготвена, како што беше во 2018 година“, додаде Рен.
„ЕЦБ мора, во рамките на својот мандат, да дејствува како сидро за економска и финансиска стабилност во овој пејзаж на големи предизвици“, рече Рен. „Никој не треба да се сомнева дека оваа одговорност ќе ја преземеме во целост.
