Бранислав Недимовиќ, министерот за земјоделство, шумарство и водостопанство на Србија изјави дека се пронаоѓаат нови рути за извоз на српските производи во Русија. Српски производи ќе бидат испорачувани на рускиот пазар преку Турција и некои балтички земји.
„Отворивме нови пунктови, одиме преку Турција, низ балтичките земји и се работи многу подобро отколку во март и април. Отстранет е и проблемот со извозот на јаболка во Русија, но проблемот е логистика, бидејќи транспортот на еден контејнер овошје чини 4.000 евра, а сега чини 11.000 евра, а нема што да вратите“, изјави Недимовиќ.
Според Недимовиќ, сегашните случувања на светскиот пазар на храна се „детска игра“ во однос на она што ќе се случи за 6 до 12 месеци, поради што смета дека „потребна е будност на сите институции“ во Србија.
За да се заштити домашниот пазар, Србија постави квартални извозни квоти.
„Мораме да одржуваме рамнотежа. Производството без да имаме доволно за себе не смее да се случи. Во Србија мора да има се, а ние мора да имаме и доволно за соседите на Отворениот Балкан“, рече Недимовиќ.
