IKEA, најголемиот светски бренд за мебел, ги затвора своите продавници за мебел во Русија, додека нејзниот синџир на трговски центри Mega ќе продолжи да биде отворен за да се осигури снабдување на рускиот пазар со основни прехранбени намирници и лекови.
IKEA со оваа одлука се приклучува на бранот западни фирми кои го ограничуваат бизнисот со Русија по нејзината инвазија на Украина и воведувањето на санкциите од западните земји.
“Војната веќе имаше огромно човечко влијание. Тоа, исто така, резултира со сериозни нарушувања на синџирот на снабдување и условите за тргување. Поради сите овие причини, компаниските групи одлучија привремено да ги стопираат операциите на ИКЕА во Русија”, се вели во соопштението на компанијата во кое се изразува сочусвство и загриженост заради човечката трагедија во која се погодени милиони луѓе.
Групацијата Ingka, која исто така е еден од најголемите сопственици на трговски центри во светот, соопшти дека нејзините 14 трговски центри во Русија, под брендот „Mega“, остануваат отворени.
“Групацијата Ingka донесе одлука да ги паузира сите активности на IKEA за малопродажба во Русија, додека трговскиот центар MEGA ќе продолжи да биде отворен за да се осигури дека многу луѓе во Русија имаат пристап до нивните секојдневни потреби и основни работи како храна, намирници и лекови”, се вели во соопштението.
Овие одлуки имаат директно влијание врз 15.000 соработници на ИКЕА и за да им излезе во пресрет на сите работници ќе им биде исплатена плата за три месеци однапред.
Фондацијата ИКЕА, финансирана од Фондацијата Ингка, исто така објави дека ќе донира 20 милиони евра за хуманитарна помош за оние кои се присилно раселени како резултат на конфликтот во Украина.
Неодамна и двете најголеми светски компании MSC и Maersk објавија дека ќе го прекинат контејнерскиот товарен транспорт од и кон Русија, но дека и понатаму ќе продолжат со транспортот на лекови, медицински и хуманитарни материјали и и храна.
