Водечкиот германски производител на авионски мотори MTU денеска започна со изградба на фабрика за поправка на мотори во Нова Пазова, во Србија. Во фабриката ќе се инвестираат 100 милиони евра, ќе се отворат 1.800 до 2.000 работни места, а до 500 во првата фаза.
Претседателот на Србија, Александар Вучиќ, рече дека доаѓањето на MTU е показател за напредокот на Србија и дека станува збор за една од најмодерните и најдобри компании за производство и одржување на авионските мотори.
Вучиќ изјави дека германските инвеститори ја избрале Србија во конкуренција на неспоредливо посилна земја-членка на ЕУ и истакна дека платите на вработените ќе бидат трипати поголеми од просечната плата во земјата.
„Зборувавме за ова веќе три години и сонуваме за овој ден. „На секои пет дена, ги следевме извештаите за да видиме каква е состојбата со MTU – што сторивме и што треба да забрзаме“, рече Вучиќ во обраќањето на свеченоста.
MTU е водечки производител на мотори во Германија и технолошки лидер во областа на турбини со низок притисок, компресори со висок притисок, рамки на централни турбини, како и процеси на производство и техники за поправка.
Околу 30 % од активните авиони денес во светот имаат вградени компоненти на MTU, а во секторот за комерцијално одржување е меѓу трите најголеми даватели на услуги за мотори на комерцијални авиони и индустриски гасни турбини.
MTU, меѓу другото, има водечка улога во обезбедувањето одржување и сервисирање на моторот V2500, кој се наоѓа во сегашниот авион „Airbus A 320“.
