*Дигитализацијата и прецизното земјоделство носат поголема продуктивност, пониски трошоци и поефикасно користење на ресурсите.
Oколу 43% од фармите во ЕУ имаат пристап до интернет во 2023 година. Некои северни и централни европски земји, како што се Данска, Германија, Словачка, Латвија, Чешка и Австрија, имале стапки над 90%, покажуваат информациите објавени од Евростат.
Информациските системи за управување со фарми – дигитални платформи за земјоделски операции – ги користеле околу 11% од фармите во ЕУ, при што Франција имала највисока стапка на усвојување (околу 60%).
Спротивно на тоа, усвојувањето на роботиката (машини способни за автономно работење без директна човечка интервенција) било релативно ниско, опфаќајќи околу 7% од сите фарми.
Истовремено, околу 18% од фармите со искористена земјоделска површина применувале некоја технологија или практика на прецизно земјоделство. Тука спаѓаат автоматизирано и прецизно третирање на растенијата, технологии со променлива стапка на примена, следење на земјоделските култури и анализа на почвата со помош на податоци од сензори, сателити и GPS.
Иако вакви технологии користи помал дел од фармите, тие управуваат со околу 44% од вкупната искористена земјоделска површина во ЕУ, што покажува дека прецизното земјоделство е позастапено кај поголемите земјоделски стопанства.
Разликите меѓу земјите се значителни. Во Луксембург, Финска и Естонија, повеќе од 75% од земјоделската површина е управувана од фарми што користат технологии за прецизно земјоделство. На другиот крај е Кипар со околу 1%, додека во Грција и Романија уделот се движи меѓу 10% и 15%.
Податоците покажуваат дека, иако дигитализацијата и прецизните технологии постепено стануваат дел од европското земјоделство, нивната примена останува нерамномерна, со големи разлики во дигиталната подготвеност на фармите низ ЕУ.
