Според проекциите на Меѓународниот монетарен фонд (ММФ), Индија се очекува во 2027 година да стане четврта најголема економија во светот, надминувајќи ја Јапонија, која ќе падне на шестото место – зад Велика Британија.
Ова се наведува во извештајот на ММФ објавен во четвртокот, во кој детално се прикажани различните развојни патеки на овие две азиски економии.
Според податоците објавени од ММФ по неговиот најнов извештај за изгледите на светската економија, се очекува Јапонија оваа година да ја задржи позицијата на земја со четврти најголем номинален бруто-домашен производ (БДП) во светот, веднаш зад САД, Кина и Германија. По Јапонија следуваат Велика Британија, Индија и Франција.
Сепак, во 2027 година се очекува значителна промена. Според прогнозите на ММФ, Индија ќе стане четврта најголема економија во светот, со БДП што ќе достигне 4.520 милијарди долари.
Зад Индија ќе се најдат Велика Британија (4.490 милијарди долари) и Јапонија (4.470 милијарди долари), која ќе падне на шестото место. Франција ќе остане седма најголема економија во светот (3,65 трилиони долари).
На прес-конференција во Бангкок, одржана во четвртокот на маргините на годишните состаноци на ММФ, претставници на Фондот ја истакнаа исклучителната сила на индиската економија. Како резултат на тоа, ММФ значително ја зголеми прогнозата за растот на Индија (за 0,6 процентни поени) и сега очекува економијата да порасне за 7% во 2027 година, поттикната од силната домашна побарувачка и стабилниот сектор на услуги.
Генерално, економиите во развој остануваат главниот двигател на економскиот раст во Азија, иако се очекува нивната кумулативна стапка на раст годинава да забави на 5,1 отсто, од 5,6 отсто минатата година, поради растот на цените на енергенсите.
За разлика од нив, во случајот со Јапонија, ММФ предвидува економски раст од само 0,7% оваа година, а сличен раст се очекува и во 2027 година.
Јапонскиот архипелаг, кој долго време беше загрозен од дефлација, од пролетта 2022 година се соочува со постојан раст на потрошувачките цени. Овој тренд годинава дополнително се влоши поради зголемувањето на цените на јаглеводородите и падот на јенот, кој во однос на доларот достигна најниско ниво во последните 40 години, што го поскапува увозот.
Растот на каматните стапки и стареењето на населението се исто така фактори што влијаат врз јапонската економија.
Македонија има мала трговска размена со Индија
Македонската економија има мала трговска соработка со Индија. Според податоците од Државниот завод за статистика, трговската размена помеѓу двете земји минатата 2025 година изнесувала близу 133 милиони долари. Извозот од Македонија лани изнесувал само 6,8 милиони долари, додека од Индија биле увезени стоки вредни 126 милиони долари.
Во споредба со претходната година, извозот на стоки во Индија во 2025 година се зголемил за 51%, но во споредба со 2021 година извозот е помал за 20%.
Увозот, пак, на стоки од Индија бележи постојан раст во последните пет години. Во 2025 година вредноста на увозот на стоки од Индија била за 25% зголемена на годишно ниво, додека во споредба со пред пет години, увозот бил поголем за 86%.
ПОВРЗАНИ ОБЈАВИ:
Индија го предводи глобалниот раст: Најбрзо растечката економија меѓу сите земји од Г20
Големата експанзија на Индија ќе биде клучен двигател на глобалниот економски раст
