Европскиот пазар на патнички автомобили порасна осми последователен месец во март, зголемувајќи се за 28,8% на годишно ниво, објави денеска Европската асоцијација на производители на автомобили (ACEA).
Регистрациите на патнички автомобили во ЕУ надминаа милион единици (1,087 милиони) во март, се вели во соопштението ACEA.
Силната експанзија, исто така, произлезе од ниската споредбена база во 2022 година поради кризата со недостиг на полупроводници.
Сите клучни пазари на ЕУ забележаа двоцифрено зголемување минатиот месец, со најголем раст во Шпанија (66,1%) и Италија (40,7%) .
Регистрациите на електрични автомобили со батерии се зголемија за 58% до 151.573 единици во март, што е учество од 13,9% од пазарот и претставува зголемување од 2,5 процентни поени од март 2022 година (11,4%). Март забележа значителен пораст на пазарниот удел на хибридни автомобили до 24,3%, со зголемување на продажбата за 38,1% до 264.694 единици. И покрај преминот кон поодржливи модели, бензинските автомобили сè уште го задржуваат најголемиот удел на пазарот со 37,5%.
Во периодот јануари-март, продажбата на нови автомобили во ЕУ скокна за 17,9% на речиси 2,7 милиони.
Извор: ACEA
