Германскиот извоз ги надмина прогнозите со раст од 4,5 % во јуни, достигнувајќи рекордно ниво благодарение на побарувачката од Европската унија, САД и Кина, покажаа податоците во средата.
Извозот се зголеми трет месец по ред, туркајќи го сезонски прилагодениот трговски суфицит на Германија на 6,4 милијарди евра (6,51 милијарди долари) во јуни, што е значително над прогнозата за 2,7 милијарди евра.
Прелиминарните податоци од мај покажаа дека Германија го забележа својот прв трговски дефицит по повеќе од 30 години, но мајската бројка од -1,0 милијарди евра беше ревидирана во средата на суфицит од 0,8 милијарди евра.
Извозот во САД, најголемиот германски извозен пазар, се зголеми за 6,2% во јуни во споредба со мај, додека извозот во земјите-членки на Европската унија е зголемен за 3,9%.
Сепак, економистите предупредија дека бројките на заводот за статистика се пресметани на номинална основа и не го вклучуваат влијанието на растот на цените.
„Овие бројки треба да се земат со резерва“, рече Томас Гицел од VP Bank.
Увозот во јуни се зголеми за 0,2% во однос на претходниот месец во календарски и сезонски приспособени услови, соопшти федералниот завод за статистика.
Аналитичарите анкетирани од Ројтерс укажаа на месечен пораст од 1% на извозот и 1,3% на увозот.
