Преку креирање на новата дигитална платформа се планира да се зголеми конкурентноста и да се отворaт нови можности за пласман на странски пазари на производи од текстилната и чевларската индустрија во земјава.
Министерката за финансии Нина Ангеловска денеска оствари првична работна средба со претставници од текстилната, чевларската индустрија, МАСИТ, УСАИД, БЕП (Business Ecosystem Project), Асоцијација за е-трговија и Старт уп Македонија за реализација на оваа идеја, информираат од Министерството за финансии.
Со ова ќе им се помогне на компаниите од овие сектори да креираат дополнителна вредност и да освојуваат нови пазари и купувачи.
Како што беше истакнато на состанокот, кој се одржа во Министерството за финансии, скоро 80% од текстилното производство во земјава е лон производство. Чевларските работилници, пак, како што посочија претставниците, најголем број се мали компании. Преку мултисекторски пристап може да се отклучи потенцијалот, претприемнчикото размислување, користење на нови технологии и пласман на квалитетни домашни текстилни производи и чевли.
Од претставниците на компаниите беше поздравена идејата за формирање на дигитална платформа (marketplace). Се планира истата да се формира како независна, во која ќе можат да пристапат сите заинтересирани компании од текстилната и чевларската индустрија.
Kако што соопшти претходно министерката Ангеловска, дигиталната платформа подоцна ќе може да се проширува и кон неа да се приклучат и други производи од други заинтересирани извозни индустрии.
Оваа платформа се планира да биде подготвена и лансирана до септември, а Министерство за финансии заедно со Царинска управа ќе работат да ги олеснат сите административни пречки и да го олеснат патот за сите компании.
